ទីប្រឹក្សាសំខាន់របស់លោកប្រធានាធិបតីបៃដិន បានមកដល់ប្រទេសអ៊ីស្រាអែល កាលពីថ្ងៃចន្ទ ដើម្បី​​បន្តកិច្ចខិតខំប្រឹងប្រែងក្នុងការបន្ថយភាពតានតឹង នៅក្នុងតំបន់ និង​ដើម្បី​បញ្ចៀស​ការ​ប្រឈម​​មុខ​ទីពីរ នៅក្នុងសង្គ្រាមរបស់អ៊ីស្រាអែលប្រឆាំងនឹងក្រុមហាម៉ាស។

អ្នក​នាំពាក្យសន្តិសុខជាតិ លោក John Kirby បានបញ្ជាក់នៅក្នុងសន្និសីទសារព័ត៌មាន កាល​ពី​ថ្ងៃ​ចន្ទ​ថា ទីប្រឹក្សាថាមពលជាន់ខ្ពស់ លោក Amos Hochstein ស្ថិតនៅក្នុងប្រទេសអ៊ីស្រាអែល ដើម្បី​និយាយ​ជាមួយសមភាគីអ៊ីស្រាអែល ជុំវិញការព្រួយបារម្ភថា ក្រុមហេសបូឡា នៅ​ប្រទេស​លី​បង់​ភាគ​ខាងត្បូង អាចចូលរួមក្នុងសង្រ្គាមកាន់តែធំ។

លោក Kirby បានប្រាប់អ្នកយកព័ត៌មានថា៖«យើងមិនចង់ឃើញសង្គ្រាមនេះរីករាលដាលទេ។ យើង​មិន​ចង់ឃើញវាពង្រីកកាន់តែធំទេ។ យើងប្រាកដជាមិនជឿថា វាជា​ផល​ប្រយោជន៍​របស់​នរណា​ម្នាក់​ទេ ប្រាកដណាស់មិនមែនជាផលប្រយោជន៍របស់ប្រជាជនអ៊ីស្រាអែល ដែលមាន​ខ្សែ​ត្រៀម​ជួរ​មុខទីពីរមួយ នៅទីនោះ នៅភាគខាងជើង»។ 

លោក Kirby បានបន្ថែមថា៖«ទោះបីជាអ្វីដែលលោក Amos កំពុងធ្វើក៏ដោយ អ្វីដែល​ក្រុម​របស់​យើង​កំពុង​ធ្វើ គឺជាអ្វីគ្រប់យ៉ាងដែលយើងអាចធ្វើបាន ដើម្បីជួយ​ការពារ​សេណារី​យោ​មិន​ឲ្យ​កើត​ឡើង​»។

លោក Kirby បានពណ៌នាការសម្រេចចិត្តរបស់លោក Amos ថាជា«សេចក្តីសង្ខេបដ៏ខ្លីមួយ» បន្ទាប់​ពី​ការ​ពិភាក្សាដែលលោកមានមួយសប្តាហ៍មុន ជាកន្លែងដែលលោក បាននិយាយ​ជាមួយ​មន្រ្តី​លីបង់ និងមន្រ្តីអ៊ីស្រាអែលនៅភាគខាងជើងអំពីហានិភ័យនៃខ្សែត្រៀមជួរទីពីរ គឺខ្សែ​ត្រៀម​ជួរ​មុខ​នៅ​ភាគ​ខាងជើង៕