កងឆ្មាំល្បាតឆ្មេរជប៉ុនបាននិយាយនៅថ្ងៃអង្គារ (២១ វិច្ឆិកា) ថា ប្រទេសកូរ៉េខាងជើង បាន​ជូន​ដំណឹង​ដល់ប្រទេសជប៉ុនថា ខ្លួនគ្រោងនឹងបាញ់បង្ហោះយានចម្លងផ្កាយរណបនៅចន្លោះថ្ងៃទី ២២ ខែវិច្ឆិកា ដល់ថ្ងៃទី ១ ខែធ្នូ ក្នុងទិសដៅទៅកាន់សមុទ្រលឿង និងសមុទ្រចិនខាងកើត។

ប្រសិន​បើការបាញ់បង្ហោះនោះត្រូវបានអនុវត្ត វាទំនងជា​ជា​ការ​ប៉ុនប៉ង​លើកទីបី​របស់​រដ្ឋ​ប្រដាប់​អាវុធ​នុយ​ក្លេអ៊ែរ​ក្នុងឆ្នាំនេះ ដើម្បីដាក់ផ្កាយរណបចារកម្មទៅក្នុងគន្លងតារាវិថី។

សេចក្តីជូនដំណឹងនេះបានជំរុញឱ្យមានការថ្កោលទោសភ្លាមៗពីនាយករដ្ឋមន្ត្រីជប៉ុន លោក Fumio Kishida ដែលបាននិយាយថា ប្រព័ន្ធការពារជាតិរបស់ប្រទេសលោក រួមទាំងនាវាពិឃាត អេហ្គីស​ (Aegis) និងមីស៊ីលការពារដែនអាកាស PAC-3 បានត្រៀម​ខ្លួន​រួច​ជា​ស្រេច​ក្នុង​ករណី​មាន​ «ស្ថានភាពមិននឹកស្មានដល់» កើតឡើង។

លោក Kishida បាននិយាយថា ប្រទេសជប៉ុននឹងធ្វើការជាមួយសហរដ្ឋអាមេរិក កូរ៉េខាងត្បូង និង​ប្រទេសដទៃទៀត ដើម្បី «ជំរុញឲ្យកាន់តែខ្លាំង» ដល់កូរ៉េខាងជើងកុំឱ្យបន្តការបាញ់បង្ហោះ។ ប្រទេស​កូរ៉េខាងជើង បានព្យាយាមបាញ់បង្ហោះនូវអ្វីដែលខ្លួនហៅថាផ្កាយរណបចារកម្ម ចំនួន​ពីរ​ដង​មក​ហើយកាលពីដើមឆ្នាំនេះ ប៉ុន្តែមិនបានសម្រេច ហើយក្រុមមន្ត្រីកូរ៉េខាងត្បូង បាន​និយាយ​នៅ​ក្នុង​ប៉ុន្មាន​ថ្ងៃ​ថ្មីៗ​នេះថា ប្រទេសផ្ដាច់ខ្លួនមួយនេះ​ហាក់​ដូចជា​នឹង​ព្យាយាម​បាញ់​បង្ហោះ​ម្តង​ទៀត​ក្នុង​ពេលឆាប់ៗនេះ។

ការបាញ់បង្ហោះនេះនឹងជាលើកដំបូងចាប់តាំងពីមេដឹកនាំកូរ៉េខាងជើង លោក គីម ជុងអ៊ុន បាន​ធ្វើ​ដំណើរ​ទស្សនកិច្ចដ៏កម្រនៅក្រៅប្រទេសក្នុងខែកញ្ញា ហើយបាន​ទៅ​ពិនិត្យ​មជ្ឈ​មណ្ឌល​បាញ់​បង្ហោះ​អវកាស​ទំនើបបំផុតរបស់រុស្ស៊ី ជាទីដែលលោកប្រធានាធិបតី វ្លាឌីមៀ ពីទីន បានសន្យាថា​នឹង​ជួយ​ទី​ក្រុង​ព្យុងយ៉ាង សាងសង់ផ្កាយរណប៕