រដ្ឋធានីញ៉ូវ ដេលី របស់ប្រទេសឥណ្ឌា បានបើកសាលារៀនឡើងវិញ និងកន្លែងសាងសង់មួយចំនួនកាលពីថ្ងៃច័ន្ទ (២០ វិច្ឆិកា) ស្របពេលមានសញ្ញាថយចុះនៃកង្វក់បរិយាកាស ទោះបីជាគុណភាពខ្យល់នៅតែត្រូវបានចាត់ថ្នាក់ថាមានគ្រោះថ្នាក់ក៏ដោយ ខណៈពពុះមានជាតិពុលបានគ្របដណ្តប់លើទន្លេ យ៉ាមុណា (Yamuna) ដែលហូរកាត់ទីក្រុង។
រដ្ឋធានីដែលមានកង្វក់បរិយាកាសបំផុតរបស់ពិភពលោកមួយនេះ បានបន្តការទប់ទល់ប្រចាំឆ្នាំរបស់ខ្លួនលើកង្វក់ក្នុងខែនេះ បើទោះបីជារដ្ឋាភិបាលបានសន្យាថានឹងកែលម្អគុណភាពខ្យល់ក៏ដោយ។
ក្រុមតាមដានគុណភាពខ្យល់ IQAir របស់ស្វីសបាននិយាយថា សន្ទស្សន៍គុណភាពខ្យល់កាលពីថ្ងៃច័ន្ទ (AQI) មានកម្រិត ៣៣៦ ដោយបានធ្លាក់ចុះពីកម្រិត ៥០៩ កាលពីថ្ងៃព្រហស្បតិ៍ ប៉ុន្តែនៅតែស្ថិតក្នុងកម្រិត «គ្រោះថ្នាក់»។
ក្មេងៗបានពាក់ម៉ាស់នៅតាមផ្លូវទៅសាលារៀន បន្ទាប់ពីបិទជិតពីរសប្តាហ៍ ដើម្បីការពារពួកគេពីកង្វក់បរិយាកាស ខណៈពលរដ្ឋកាន់សាសនាហិណ្ឌូប្រារព្ធពិធីបុណ្យមួយ បានធ្វើដំណើរឆ្លងកាត់ផ្សែងអ័ព្ទពេលព្រឹកដើម្បីមុជទឹកនៅក្នុងទន្លេ ដោយមិនខ្វល់ពីពពុះពណ៌ស នៅក្នុងនោះ ដែលក្រុមអាជ្ញាធរបានពិពណ៌នាថាមានជាតិពុល។
អតីតទីប្រឹក្សារដ្ឋាភិបាលក្រុងដេលី ម្នាក់បាននិយាយថា ពពុះនេះកើតចេញមកពីកាកសំណល់ភក់ និងកាកសំណល់ដែលមិនបានធ្វើប្រព្រឹត្តិកម្ម ដោយបន្ថែមថា ក្រុមគ្រប់គ្រងទឹករបស់ទីក្រុង កំពុងបាញ់ថ្នាំគីមីអាហារ ដើម្បីគ្រប់គ្រងពពុះដ៏គ្រោះថ្នាក់នោះហើយ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
