ភ្នំពេញ៖ ឯកឧត្តម គីម វីរៈ អគ្គលេខាធិការគណៈកម្មាធិកាជាតិគ្រប់គ្រងគ្រោះមហន្តរាយ នៅថ្ងៃទី២១ ខែវិច្ឆិកា ឆ្នាំ២០២៣ បានដឹកនាំ​គណៈប្រតិភូចូលរួម​បំពេញ​ទស្សន​កិច្ច​សិក្សា​ផ្តោត​លើ​យន្ត​ការគ្រប់គ្រងគ្រោះមហន្តរាយអឺរ៉ុប នៅការិយាល័យគណៈកម្មាធិការសហភាពអឺរ៉ុប នៅទី​ក្រុង​ប្រ៊ុច​សែល ប្រទេលប៊ែលហ្សិក។

គោលបំណងនៃដំណើរទស្សនកិច្ចនេះ គឺដើម្បីទទួលបានការយល់ដឹង និងចំណេះ​ដឹង​អំពី​របៀប​ដែល​សហគម​អឺរ៉ុបដោះស្រាយ និងសម្របសម្រួលស្ថានភាពគ្រោះអាសន្ន និងជំរុញការចែក​រំលែក​ចំណេះ​ដឹង និងពង្រឹងសមត្ថភាពគ្រប់គ្រងគ្រោះមហន្តរាយនៅក្នុងតំបន់។

ក្នុងដំណើរទស្សនកិច្ចនេះផងដែរ គណៈប្រតិភូនឹងស្វែងយល់​អំពី​មជ្ឈមណ្ឌល​ប្រតិបត្តិការ​សង្គ្រោះ​បន្ទាន់ (EOC) និងស្វែងយល់អំពីដំណើរការគ្រប់គ្រង និងការសម្របសម្រួលរបស់ខ្លួន។ 

គណៈប្រតិភូ គណៈកម្មាធិការជាតិគ្រប់គ្រងគ្រោះមហន្តរាយ ក៏បានចូលរួម​សង្កេត​ពី​របៀប​ដែល​ភាគី​ពាក់ព័ន្ធ​នានាធ្វើការរួមគ្នា ដើម្បីធានាបាននូវការទំនាក់ទំនងប្រកបដោយប្រសិទ្ធភាព ការ​បែង​ចែក​ធនធាន និងការធ្វើសេចក្តីសម្រេចចិត្តក្នុងអំឡុងពេលមានស្ថានភាពធ្ងន់ធ្ងរ។

ដំណើរទស្សនៈកិច្ចនេះផងដែរ គឺ​ជា​កិច្ច​ខិតខំ​ប្រឹង​ប្រែង​រួម​គ្នា​ដែល​មាន​តំណាង​មក​ពី​ប្រទេស​សមាជិក​អាស៊ាន​ទាំងអស់ និងបានការសម្របសម្រួលពីមជ្ឈមណ្ឌល AHA (មជ្ឈមណ្ឌល​សម្រប​សម្រួល​អាស៊ាន​ សម្រាប់ជំនួយមនុស្សធម៌លើការគ្រប់គ្រងគ្រោះមហន្តរាយ)។

នៅថ្ងៃបន្ទាប់ គណៈប្រតិភូនឹងបន្តដំណើរទស្សនកិច្ចសិក្សាក្នុងលំហាត់សាកល្បងនៅទីក្រុង Belgrade ប្រទេសស៊ែប៊ី។ លំហាត់​នេះ​នឹង​ផ្តល់​នូវ​បទ​ពិសោធន៍​ជាក់​ស្តែង​ដែល​អនុញ្ញាត​ឱ្យ​គណៈ​ប្រតិភូ​សង្កេត​ និងស្វែងយល់​ពី​ការ​អនុវត្ត​គំនិត​ នៃ​ការ​គ្រប់​គ្រង​គ្រោះ​មហន្តរាយ​នៅ​ក្នុង​សេណារីយ៉ូ​ដែលបា​នរៀបចំឡើង។

លំហាត់នេះនឹងផ្តល់ឱកាស ក្នុងការផ្លាស់ប្តូរចំណេះដឹង និងការកសាងសមត្ថភាព​ក្នុង​ការ​គ្រប់​គ្រង​គ្រោះ​មហន្តរាយ រួមចំណែកដ​ល់​កិច្ច​ខិតខំ​ប្រឹងប្រែង​រួម​របស់​ប្រទេស​សមាជិក​អាស៊ាន​ក្នុង​ការ​ធានា​សុវត្ថិភាព និងសុខុមាលភាពរបស់ប្រជាជនក្នុងអំឡុងពេលមានវិបត្តិ៕