ភ្នំពេញ៖ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បាន​ថ្លែង​អំណរ​គុណ​ដល់​ក្រុមហ៊ុនជប៉ុន​ដែល​បន្ត​ផ្តល់​កិច្ច​សហការ​បណ្តុះ​បណ្តាល​ធន​ធាន​មនុស្ស​ដល់​សាលា​មធ្យម​សិក្សា​បច្ចេកទេស ហ្ស៊ី វ៉េ សេ (JVC) លើជំនាញជួសជុល និងថែទាំរថយន្ត រួមទាំង​គម្រោង​បណ្តុះបណ្តាល​សមត្ថភាព​សិក្ខាកាម​របស់​កម្ពុ​ជា​នៅ​ប្រទេស​ជប៉ុន​តាម​រយៈ​គម្រោង​កម្ម​សិក្សា​។

ក្រសួងការងារ និងបណ្តុះបណ្តាលវិជ្ជាជីវៈ នៅក្រោយចប់ជំនួបការងារ រវាងឯកឧត្តមរដ្ឋមន្រ្តី និង​លោក តាកាហាស៊ី ហ្វ៊ូមីអាគិ (Takahashi Fumiaki) ប្រធានសមាគមជប៉ុន-កម្ពុជា និង​គណៈ​ប្រតិភូ​ នៅថ្ងៃទី២១ ខែវិច្ឆិកា ឆ្នាំ២០២៣នេះ បានឲ្យដឹងថា ក្នុងកិច្ចពិភាក្សានាឱកាសនោះ ឯកឧត្តម​រដ្ឋមន្ត្រី និងគណៈប្រតិភូ ក៏បានពិភាក្សាអំពីលក្ខខណ្ឌការងារ និង​ឱកាស​នៃ​ការ​ពង្រីក​ទីផ្សារ​ការងារនៅប្រទេសជប៉ុន រួមទាំងការ​ពង្រីក​លទ្ធភាព នៃ​កិច្ច​សហការ​ផ្សេង​ទៀត​ដែល​ក្រុម​ហ៊ុន​ជប៉ុន​មើល​ឃើញពីសក្តានុពលនៅកម្ពុជា។ ក្នុងនោះ ភាគីជប៉ុន ក៏បានលើក​ឡើង​ពី​គម្រោង​ពង្រីក​វិសាលភាព និងការពង្រឹងសមត្ថភាពរបស់សាលាមធ្យមសិក្សាបច្ចេកទេស ហ្ស៊ី វ៉េ សេ ដើម្បី​ឆ្លើយតបនិងតម្រូវការនាពេលបច្ចុប្បន្នផងដែរ។

មួយវិញ​ទៀត ឯកឧត្តមរដ្ឋមន្រ្តី បានបញ្ជាក់ជូនក្រុមហ៊ុនជប៉ុនថា តាមរយៈគោលនយោបាយ និង​កម្ម​វិធី​អាទិភាព​របស់​ក្រសួង​ដែល​ស្រប​ទៅនឹ​ង​គោល​នយោបាយ​របស់​រាជរដ្ឋាភិបាល អាណត្តិទី៧​នេះ ​នឹងធ្វើឱ្យកម្ពុជាមានកម្លាំងពលកម្មជំនាញកាន់តែច្រើនដើម្បីធានាប្រសិទ្ធភាពនៃផលិតកម្ម និង​ផលិតភាពខ្ពស់ដែលជាតម្រូវការរបស់ក្រុមហ៊ុនវិនិយោគ។

មុននឹង​បញ្ចប់ ឯកឧត្តមរដ្ឋមន្ត្រី បានបញ្ជាក់ជូនសមាគមជប៉ុន-កម្ពុជាថា ក្នុងក្រប​ខណ្ឌ​វិស័យ​ការងារ និងបណ្តុះបណ្តាលវិជ្ជាជីវៈ ក្រសួង​បាន​ត្រៀម​លក្ខណៈ​សម្បត្តិ​ជួយ​ក្រុម​ហ៊ុន​ជប៉ុន​ដែល​មាន​បំណង​បោះទុនវិនិយោគនៅកម្ពុជា៕