រដ្ឋមន្ត្រីក្រសួងមហាផ្ទៃទួរគី លោក អាលី យឺលីកាយា (Ali Yerlikaya) បាននិយាយថា ក្រុមជួយសង្គ្រោះទួរគី កាលពីថ្ងៃច័ន្ទ (២០ វិច្ឆិកា) បានស្វែងរកសមាជិកនាវិកចំនួន ១១ នាក់ដែលបានបាត់ខ្លួនពីកប៉ាល់ដឹកទំនិញដែលបានលិចនៅឆ្នេរសមុទ្រខ្មៅ ស្របពេលមានព្យុះដែលបានឆក់យកជីវិតមនុស្សយ៉ាងហោចណាស់ ៩ នាក់ រួមទាំងមនុស្សម្នាក់ដែលស្ថិតលើកប៉ាល់នោះ។

លោកបាននិយាយថា កប៉ាល់ឈ្មោះ កាហ្វកាមេតលឺ (Kafkametler) ដែលមានទង់ជាតិទួរគី ជាមួយនឹងនាវិក ១២ នាក់នៅលើនោះ បានលិចចេញពីឆ្នេរសមុទ្រ អេរ៉េហ្គលី (Eregli) ក្នុងខេត្ត ហ្ស៊ុងគុលដាក់ (Zonguldak) ភាគពាយ័ព្យនៃប្រទេសទួរគី ហើយសាកសពរបស់សមាជិកនាវិកម្នាក់ត្រូវបានគេរកឃើញ។

តំបន់នេះត្រូវបានវាយប្រហារដោយព្យុះដ៏ខ្លាំងកាលពីថ្ងៃអាទិត្យ ហើយអាកាសធាតុអាក្រក់បានរារាំងក្រុមសង្រ្គោះតាមអាកាស និងនាវាសមុទ្រ មិនឱ្យធ្វើប្រតិបត្តិការស្វែងរករហូតដល់ព្រឹកថ្ងៃច័ន្ទ។

លោក Yerlikaya បានប្រាប់ក្រុមអ្នកយកព័ត៌មានថា ព្យុះ និងទឹកជំនន់នៅទូទាំងប្រទេសទួរគី កាលពីចុងសប្តាហ៍បានបណ្តាលឱ្យមនុស្ស ៤ នាក់ ស្លាប់នៅក្នុងខេត្ត បាត់មាន (Batman) ភាគអាគ្នេយ៍ មនុស្សស្លាប់ ៣នាក់នៅខេត្ត ហ្ស៊ុងគុលដាក់ និងមនុស្សម្នាក់ទៀតនៅខេត្ត ឌីយ៉ាបាកឺ (Diyarbakir) នៅភាគអាគ្នេយ៍៕