ប្រធានាធិបតីអ៊ុយក្រែន លោក វ៉ូឡូមៀ ហ្សេលេនស្គី បានច្រានចោលទាំងស្រុងនូវគំនិតនៃការចាប់ផ្តើម  ការចរចាសន្តិភាពជាមួយរុស្ស៊ី បើទោះបីជាមានស្ថានភាពលំបាករបស់កងទ័ពអ៊ុយក្រែន នៅក្នុងខ្សែត្រៀមប្រយុទ្ធក៏ដោយ។

លោកបាននិយាយនៅក្នុងបទសម្ភាសន៍ជាមួយសារព័ត៌មានThe Sunថា «តើវាពិបាកនៅសមរភូមិទេ? បាទ។ ប៉ុន្តែការរាប់អានគ្នា ឬចូលតុការទូតជាមួយប្រទេសរុស្ស៊ីឥឡូវនេះ? ទេ!»។ 

តាមគំនិតរបស់លោក ប្រទេសរុស្ស៊ី មិនបានត្រៀមខ្លួនរួចរាល់ ដើម្បីបញ្ឈប់ការប្រយុទ្ធនោះទេ «ដូច្នេះ យើងមិននិយាយអំពីសន្តិភាពក្នុងតម្លៃណាមួយឡើយ»។

នៅថ្ងៃទី៤ ខែវិច្ឆិកា ទូរទស្សន៍NBC ដែលដកស្រង់សម្តីមន្ត្រីអាមេរិក បានរាយការណ៍ថា សហរដ្ឋអាមេរិក និងសហភាពអឺរ៉ុប បានចាប់ផ្តើមពិភាក្សាជាមួយអ៊ុយក្រែនអំពីកិច្ចចរចាសន្តិភាព ដែលអាចកើតមានជាមួយរុស្ស៊ី និងអ្វីដែលទីក្រុងគីវ ប្រហែលជាត្រូវបោះបង់ចោលសម្រាប់ការសម្របសម្រួលមួយ។

ទូរទស្សន៍នេះ បានឲ្យដឹងទៀតថា មន្ត្រីទាំងនោះ កំពុង «និយាយយ៉ាងស្ងៀមស្ងាត់ជាមួយរដ្ឋាភិបាលអ៊ុយក្រែនអំពីអ្វីលទ្ធភាពការចរចាសន្តិភាពជាមួយរុស្ស៊ី អាចឈានដល់»។

ទូរទស្សន៍NBC បានបញ្ជាក់ថា៖«ការសន្ទនា បានរួមបញ្ចូលការគ្រោងទុកយ៉ាងទូលំទូលាយអំពីអ្វីដែលអ៊ុយក្រែន អាចនឹងត្រូវបោះបង់ចោល ដើម្បីឈានដល់កិច្ចព្រមព្រៀងមួយ»។ កិច្ចពិភាក្សាមួយចំនួន បានធ្វើឡើង នៅក្នុងខែតុលា។

លោក ហ្សេឡិនស្គី បានច្រានចោលរបាយការណ៍ទាំងនេះ ក្នុងអំឡុងសន្និសីទកាសែតរួមមួយជាមួយប្រធានគណៈកម្មការអឺរ៉ុប លោកស្រី Ursula von der Leyen ដែលនៅក្នុងដំណើរទស្សនកិច្ច នៅទីក្រុងគីវ ដោយអះអាងថា គ្មានមេដឹកនាំសហរដ្ឋអាមេរិក ឬសហភាពអឺរ៉ុបណាម្នាក់ ដាក់សម្ពាធលើអ៊ុយក្រែនឲ្យអង្គុយនៅតុចរចាជាមួយប្រទេសរុស្ស៊ីនោះទេ។