ភ្នំពេញ ៖ រាជរដ្ឋាភិបាលលើកទឹកចិត្តឱ្យសហគ្រិន លើវិស័យកម្មន្តសាល សហគ្រាសធុនតូច និងមធ្យម និងសិប្បកម្មទាំងអស់ ចាប់យក ស្តង់ដារ គុណភាព ផលិតភាព និងអនុលោមភាព និងការប្រើប្រាស់បច្ចេកវិទ្យាបច្ចេកទេសថ្មីៗ និងនវានុវត្តន៍ ក្នុងម៉ូដែលអាជីវកម្ម និងខ្សែច្រវ៉ាក់ផលិតកម្មរបស់ខ្លួន។ 

​ឯកឧត្តម ហែម វណ្ណឌី រដ្ឋមន្រ្តីក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ លើកឡើងនៅក្នុងសិក្ខាសាលា ស្តីពីការយល់ដឹងពីការប្រើប្រាស់សញ្ញានានា ក្នុងវិស័យកម្មន្តសាល សហគ្រាសធុនតូច និងមធ្យម និងសិប្បកម្មនៅកម្ពុជា នៅថ្ងៃទី២១ ខែវិច្ឆិកា ឆ្នាំ២០២៣ នេះថា តាមការវាយតម្លៃ, ការយល់ដឹង និងការខិតខំប្រឹងប្រែងរបស់សហគ្រាសនៅក្នុងផ្នែកការប្រើប្រាស់ សញ្ញានានា នៅមានកម្រិតទាប ហើយភាគរយនៃអនុលោមភាពក៏មានតិច។ ពាក់ព័ន្ធខ្សែផលិតកម្ម, កម្ពុជាមានរោងចក្រ សហគ្រាស និង សិប្បកម្ម ដែលអាចផលិតមុខទំនិញជាច្រើនមុខ ប៉ុន្តែចំនួនអ្នកមានស្តង់ដារ និងលំដាប់គុណភាពដែលអាចនាំចេញ និងប្រកួតលើ ទីផ្សារមានចំនួនតិចតួចនៅឡើយ។ 

ជុំវិញបញ្ហានេះ ចំពោះប្រទេសជាដៃគូប្រកួតប្រជែងរបស់យើង បានដើរទៅមុខឆ្ងាយ និងលឿនជាងយើងរួចហើយលើផ្នែក នេះ ហើយផលិតផលរបស់គេដែលកំពុងបម្រើលុកលុយ និងដណ្តើមទីផ្សារយើង, ដោយហេតុថា ផលិតកររបស់គេមានការយល់ដឹង ខ្ពស់ អំពីលក្ខខណ្ឌតម្រូវអស់ទាំងនេះ និងបានកំពុងតែបោះជំហាន និងតម្លើងកម្រិតនៃអនុលោមភាព ឈានទៅលើកកម្ពស់គុណ ភាព និងស្តង់ដារ ដែលអ្នកប្រើប្រាស់ទាមទារកាន់តែខ្ពស់ទៅៗ។

ឯកឧត្តមរដ្ឋមន្រ្តី លើកឡើងបន្ថែមថា វិស័យកម្មន្តសាល សហគ្រាសធុនមីក្រូ តូច និងមធ្យម ត្រូវបានចាត់ទុកថា ជាកម្លាំង ចលករជំរុញដល់កំណើនសេដ្ឋកិច្ច សម្រាប់បណ្តាប្រទេសមានសេដ្ឋកិច្ចកំពុងរីកលូតលាស់ និងកំពុងអភិវឌ្ឍ។ រាជរដ្ឋាភិបាលនីតិកាល ទី៧ នៃរដ្ឋសភា បានចាត់ទុកវិស័យកម្មន្តសាល សហគ្រាសធុនមីក្រូ តូច និងមធ្យម គឺជាឆ្អឹងខ្នងសេដ្ឋកិច្ចជាតិ ដែលបានរួមចំណែក យ៉ាងសកម្មដល់ការអភិវឌ្ឍសេដ្ឋកិច្ច និងសង្គម។ ជាក់ស្តែងវិស័យនេះបានដើរតួនាទីយ៉ាងសំខាន់ នៃការបង្កើតការងារ ប្រាក់ចំណូល សម្រាប់ប្រជាជនដែលមានប្រាក់ចំណូលទាប ប្រជាជនងាយរងគ្រោះ ព្រមទាំងរួមចំណែកដល់ការរីកចម្រើននៃវិស័យឯកជន។ 

ក្នុងន័យនេះ, ឯកឧត្តម ហែម វណ្ណឌី លើកទឹកចិត្តដល់សិក្ខាកាមទាំងអស់ យកចិត្តទុកដាក់ស្តាប់រាល់បទបង្ហាញរបស់វាគ្មិន ដើម្បីទទួលបានពុទ្ធិគ្រប់គ្រាន់ និងច្បាស់លាស់សម្រាប់យកទៅអនុវត្តបន្ត។ និងផ្សព្វផ្សាយបន្តដល់សមាជិករៀងៗខ្លួន ទាំងនៅ រាជធានី និងតាមបណ្តាខេត្តនានា ដើម្បីពួកគាត់មានលទ្ធភាពស្វែងយល់កាន់តែល្អប្រសើរថែមទៀត ពីសារៈប្រយោជន៍នៃការប្រើ ប្រាស់សញ្ញានានា លើវិស័យកម្មន្តសាល SME នៅកម្ពុជា។ ក្រៅពីនេះសូមបណ្តាសហព័ន្ធ និងសមាគមទាំងអស់ ដែលបានកំពុង ធ្វើការងារលើវិស័យកម្មន្តសាល សហគ្រាសធុនតូច និងមធ្យម និងសិប្បកម្ម បន្តធ្វើការរួមគ្នាចងក្រងគ្នា ចែករំលែក បទពិសោធន៍ រវាងគ្នា និងចៀសវាងការប្រកួតប្រជែងសម្លាប់គ្នាឯង ដោយត្រូវបង្កើនសមត្ថភាព ផលិតភាព គុណភាព និងបរិមាណ ផលិតផលដែល មានស្តង់ដារ ដើម្បីធ្វើការនាំចេញនិងប្រកួតប្រជែង ជាមួយផលិតផលបណ្តាប្រទេសក្នុងតំបន់ និងពិភពលោក៕ អត្ថបទ៖ សុន រ៉ាឌី