ក្រសួងការបរទេសសហរដ្ឋអាមេរិក បាននិយាយថា មាននូវពលរដ្ឋអាមេរិក ដែលជាអ្នករស់នៅអចិន្រ្តៃយ៍ស្របច្បាប់ និងសមាជិកគ្រួសារតិចជាង ១.២០០នាក់ នៅក្នុងតំបន់ហ្គាហ្សា ហើយពលរដ្ឋអាមេរិកយ៉ាងហោច ៦នាក់ ត្រូវបានសម្លាប់ ចាប់តាំងពីការវាយប្រហាររបស់ក្រុមហាម៉ាសល់លើតំបន់ភាគខាងត្បូងអ៊ីស្រាអែលកាលពីថ្ងៃទី ៧ ខែតុលា ។

លោក Matthew Miller គឺជាអ្នកនាំពាក្យក្រសួងការបរទេសសហរដ្ឋអាមេរិក និយាយនៅក្នុងសន្និសីទសារព័ត៌មានថា ពលរដ្ឋអាមេរិក ប្រហែល ៨០០នាក់ ដែលជាអ្នករស់នៅអចិន្រ្តៃហ៍ស្របច្បាប់ និងសមាជិកគ្រួសារ បានចាកចេញពីតំបន់ហ្គាហ្សា តាមច្រកព្រំដែន Rafahចូលទៅកាន់ប្រទេសអេហ្ស៊ីប ហើយនៅសស់ពលរដ្ឋអាមេរិកតិចជាង ១.២០០នាក់ទៀត ។

លោកថា ពលរដ្ឋអាមេរិក ៦នាក់ បានស្លាប់ចាប់តាំងពីការវាយប្រហារកាលពីថ្ងៃទី ៧ ខែតុលារបស់ក្រុមហាម៉ាស់ បើធៀបនឹងទាហានអ៊ីស្រាអែលមានចំនួន ៥នាក់ ៤នាក់ស្លាប់នៅក្នុងតំបន់ហ្គាហ្សា និងម្នាក់ស្លាប់នៅតំបន់ភាគខាងជើងអ៊ីស្រាអែល ហើយនិងមន្រ្តីព្រំដែននគរបាលជាតិម្នាក់ ។

ខណៈពេលនោះដែរ លោក Millerបានចាត់ទុកការរឹបអូសនាវាដឹកទំនិញនៅសមុទ្រក្រហមដោយក្រុមចលនាហ៊ូធីរបស់យេម៉ែនគាំទ្រដោយអ៊ីរ៉ង់ ថាបានបំពានលើច្បាប់អន្តរជាតិ ហើយនិងទាមទារឲ្យដោះលែងនាវា និងក្រុមនាវិកជាបន្ទាន់ ។

 លោកនិយាយថា ការរឹបអូសនាវាដឹកទំនិញ Galaxy Leader នៅក្នុងសមុទ្រក្រហមរបស់ក្រុមឧទ្ទាមហ៊ូធី បានបំពានទាំងស្រុងលើច្បាប់អន្តរជាតិ ហើយពួកយើងនឹងពិគ្រោះយោបល់ជាមួយសម្ព័ន្ធមិត្តរបស់ពួកយើង ហើយនិងដៃគូអង្គការសហប្រជាជាតិ ដើម្បីចាត់វិធានការដ៏សមរម្យណាមួយ ៕