ស៊ីរ៉ែនបានរោទិ៍នៅទូទាំងទីក្រុងតែល អាវីវ ប្រទេសអ៊ីស្រាអែល នាំឲ្យប្រជាពលរដ្ឋរត់រកជម្រកការពារគ្រាប់កាលពីយប់ថ្ងៃចន្ទ ខណៈដែលប្រព័ន្ធការពារប្រទេសមួយនេះ បាញ់ស្កាត់បានរ៉ុក្កែតជាច្រើនគ្រាប់ ។

ស្របពេលនោះដែរ នៅក្នុងតំបន់ហ្គាហ្សាស្រ្ទីប មាននូវការផ្ទុះគ្រាប់ជាច្រើនលើតំបន់បិទច្រកមួយនេះ ហើយសំណុំផ្សែងដ៏ធំបានកើតមានពេលព្រះអាទិត្យលិច ខណៈអ៊ីស្រាអែល បន្តការវាយប្រហាររបស់ខ្លួនលើគោលដៅរបស់ក្រុមឧទ្ទាមហាម៉ាស់ ។

យោធាអ៊ីស្រាអែល និយាយថា កងកម្លាំងអ៊ីស្រាអែល រឹបអូសបានតំបន់ជាច្រើននៅភាគខាងជើង ភាគពាយព្យ និងភាគខាងកើតទីក្រុងហ្គាហ្សា ប៉ុន្តែក្រុមហាម៉ាស់ និងសាក្សី និយាយថា ក្រុមជីវពលធ្វើសង្រ្គាមបែបទ័ពព្រៃនៅកន្លែងលាក់ខ្លួនរបស់ពួកគេនៅតំបន់ភាគខាងជើង ដែលរួមទាំងនៅតំបន់ខ្លះនៃទីក្រុងហ្គាហ្សា និងជំរំជនភៀសខ្លួន Jabalia និង Beach ។

យោងតាមសេចក្តីថ្លែងការណ៍ដែលចុះផ្សាយដោយកសារព័ត៌មានរដ្ឋាភិបាលគ្របគ្រងដោយក្រុមហាម៉ាស់នៅតំបន់ហ្គាហ្សា បានឲ្យដឹងថា ជនប៉ាឡេស្ទីនយ៉ាងហោច ១៣.៣០០នាក់ ត្រូវបានសម្លាប់នៅក្នុងតំបន់ហ្គាហ្សា ចាប់តាំងពីសង្រ្គាមផ្ទុះឡើងកាលពីថ្ងៃទី ៧ ខែតុលា ។ 

ដោយឡែក មនុស្សប្រហែល ១.២០០នាក់ ដែលភាគច្រើនគឺជាជនស៊ីវិល ត្រូវបានសម្លាប់ អំឡុងការវាយប្រហារដ៏គួរឲ្យភ្ញាក់ផ្អើលរបស់ក្រុមហាម៉ាស់លើតំបន់ភាគខាងត្បូងអ៊ីស្រាអែល នៅថ្ងៃស្លាប់មនុស្សច្រើនបំផុតក្នុងប្រវត្តិសាស្រ្តរយៈពេល ៧៥ឆ្នាំរបស់អ៊ីស្រាអែល ៕