រូបថតសន្លឹកពីកងទ័ពជើងទឹកកូរ៉េខាងត្បូង ឃើញនាវាដឹកយន្តហោះចម្បាំង Carl Vinson របស់សហរដ្ឋអាមេរិក ធ្វើដំណើរទៅដល់កំពង់ផែនៅទីក្រុង Busan របស់កូរ៉េខាងត្បូង ជាការទប់ទល់ប្រឆំាងនឹងកម្មវិធីមីស៊ីល និងនុយក្លេអ៊ែរកូរ៉េខាងជើង ។

ឧត្តមនាវីទោកូរ៉េខាងត្បូង Kim Ji-hoon និយាយនៅក្នុងសេចក្តីថ្លែងការណ៍ថា ការមកដល់របស់នាវាដឹកយន្តហោះចម្បាំង Carl Vinson បានបង្ហាញពីកម្លាំងការពាររួមគ្នាដ៏ខ្លាំងក្លា ហើយនិងឆន្ទៈប្រកបដោយការប្តេជ្ញាចិត្ត ដើម្បីឆ្លើយតបនឹងការគំរាមកំហែងមីស៊ីល និងនុយក្លេអ៊ែរកូរ៉េខាងជើង ដោយសម្ព័ន្ធមិត្តកូរ៉េខាងត្បូង-សហរដ្ឋអាមេរិក ។

យោងតាមការអះអាងរបស់ឆ្មាំល្បាតឆ្នេរជប៉ុន បានឲ្យដឹងថា ការមកដល់របស់នាវាដឹកយន្តហោះចម្បាំងអាមេរិក បានកើតមានឡើង ស្របពេលដែលកូរ៉េខាងជើង មានគម្រោងបាញរ៉ុក្កែតដឹកផ្កាយរណបអវកាសនៅចន្លោះថ្ងៃទី ២២ ខែវិច្ឆិកា និងថ្ងៃទី ១ ខែធ្នូ ក្នុងទិសដៅសមុទ្រលឿង និងសមុទ្រចិនខាងកើត ។

វានឹងក្លាយជាការព្យាយាមលើកទី ៣ដោយកូរ៉េខាងជើងដែលប្រដាប់ដោយអាវុធនុយក្លេអ៊ែរក្នុងឆ្នាំនេះ ដើម្បីបញ្ជូនផ្កាយរណបចារកម្មទៅកាន់គន្លងតារាវិថី ៕