បុគ្គលិករាប់រយនាក់របស់ក្រុមហ៊ុន OpenAI កាលពីថ្ងៃចន្ទ (ទី២០ ខែវិច្ឆិកា) បានគំរាមលាឈប់ពីក្រុមហ៊ុនបញ្ញាសិប្បនិម្មិត (AI) ឈានមុខគេមួយនេះ ហើយទៅចូលរួមជាមួយក្រុមហ៊ុន Microsoft ដោយក្រុមហ៊ុនមានវិបត្តិកាន់តែធ្ងន់ធ្ងរ ក្រោយបញ្ចប់តំណែងនាយកប្រតិបត្តិ លោក Sam Altman។

ព្រឹត្តិការណ៍ ដែលកើតឡើងជាបន្តបន្ទាប់យ៉ាងឆាប់រហ័ស បានឃើញថា លោក Altman ដែលត្រូវបានដកចេញពីតួនាទីដោយក្រុមប្រឹក្សារបស់ក្រុមហ៊ុនចាស់ កាលពីថ្ងៃសុក្រចុងសប្ដាហ៍កន្លងមក ឥឡូវនេះ ត្រូវបានជួលឲ្យបំពេញការងារដោយក្រុមហ៊ុន Microsoft ជាកន្លែងដែលលោកនឹងដឹកនាំក្នុងការអភិវឌ្ឍក្រុមស្រាវជ្រាវ AI កម្រិតខ្ពស់ថ្មី។

បន្ទាប់ពីមានការបញ្ចប់តំណែងនាយកប្រតិបត្តិនោះ នៅក្នុងលិខិតមួយដែលត្រូវបានចេញផ្សាយដោយបណ្ដាញសារព័ត៌មាន ភាគច្រើននៃបុគ្គលិក ដែលមានចំនួន ៧៧០នាក់របស់ក្រុមហ៊ុន OpenAI បានលើកឡើងថា ពួកគេនឹងដើរតាមគន្លងរបស់លោក Altman ប្រសិនបើក្រុមប្រឹក្សាភិបាលដែលទទួលខុសត្រូវចំពោះការចាកចេញរបស់អតីតនាយកប្រតិបត្តិ មិនលាលែងពីតួនាទីទេនោះ។

ក្នុងចំណោមអ្នកចុះហត្ថលេខាឲ្យមានការបញ្ចប់តំណែងនោះ មានលោក Ilya Sutskever ដែលជាប្រធានអ្នកវិទ្យាសាស្ត្ររបស់ក្រុមហ៊ុន និងជាសមាជិកនៃក្រុមប្រឹក្សាទាំង ៤នាក់ ដែលបានបង្ខំឲ្យលោក Altman ចាកចេញ។ តាមរយៈការការបង្ហោះនៅលើបណ្ដាញសង្គម X (ពីមុន Twitter) លោក Sutskever បានប្រាប់ថា៖ «ខ្ញុំមានការសោកស្តាយយ៉ាងខ្លាំង ចំពោះការមានចំណែករបស់ខ្ញុំ នៅក្នុងសកម្មភាពរបស់ក្រុមប្រឹក្សា។ ខ្ញុំមិនដែលមានចេតនាបំផ្លាញក្រុមហ៊ុន OpenAI នោះទេ»។

អ្នកហត្ថលេខីម្នាក់ទៀត គឺនាយកប្រតិបត្តិជាន់ខ្ពស់ លោកស្រី Mira Murati ដែលត្រូវបានតែងតាំងជំនួសលោក Altman ជានាយកប្រតិបត្តិ នៅពេលដែលរូបលោកត្រូវបានដកចេញកាលពីថ្ងៃសុក្រ ប៉ុន្តែលោកស្រីបានបោះចោលតំណែងនេះ កាលពីចុងសប្តាហ៍។

ពាក់ព័ន្ធនឹងលិខិតគំរាមចាកចេញ បុគ្គលិកជាច្រើនបានបង្ហោះនៅលើបណ្ដាញសង្គម កាលពីថ្ងៃចន្ទថា បុគ្គលិករបស់ក្រុមហ៊ុន OpenAI រហូតដល់ ៩០ភាគរយ បានចុះហត្ថលេខាក្នុងលិខិតនោះ៕