ភ្នំពេញ ៖ លោកតំណាងឲ្យរោងចក្រកាត់ដេរសម្លៀកបំពាក់ តូយ៉ូគិ បានចាត់ទុកកម្មវិធីបណ្តុះបណ្តាលជំនាញវិជ្ជាជីវៈដល់យុវជនមកពីគ្រួសារក្រីក្រ និងគ្រួសារងាយរងហានិភ័យចំនួន ១,៥លាននាក់ របស់រាជរដ្ឋាភិបាលអាណិត្តទី៧នេះ នឹងជំរុញឲ្យផលិតផលក្នុងរោងចក្រកាន់តែល្អប្រសើរជាងមុន ទាំងការផលិតភាពការងារ និងគុណភាពទំនិញជាដើម។

​នៅក្នុងកិច្ចសម្ភាសន៍ជាមួយទូរទស្សន៍ព័ត៌មាន ប៊ីធីវី លោក ម៉ៅ វណ្ណៈ ប្រធានផ្នែកធនធានមនុស្ស នៃរោងចក្រកាត់ដេរសម្លៀកបំពាក់ តូយ៉ូគិ អឹភែរឹល (ខេមបូឌា) ឯ.ក បានរៀបរាប់ថា នៅពេលដែលរោងចក្របើកដំណើរការដំបូងក្នុងឆ្នាំ២០១៥ ការដាក់ស្នើសុំចូលបំពេញការងាររបស់កម្មករនិយោជិត និងបុគ្គលិកតាមផ្នែកជំនាញនីមួយៗ បានកត់សម្គាល់ឃើញថា អ្នកមានជំនាញ៥០% និងអត់ជំនាញ៥០% ដែលធ្វើឲ្យប៉ះពាល់ច្រើនដែរមកកាន់រោងចក្រ ដូចជាចំណាយពេលវេលា និងប្រាក់កាក់ដើម្បីបញ្ជូនកម្មករនិយោជិតទៅរៀនសូត្របន្ថែម ដើម្បីឲ្យយល់ដឹងពីការងារ និងបំពេញចន្លោះដែលខ្វះខាត។

លោកបានបន្តថា ទាក់ទិននិងគោលនយោបាយថ្មីដែលដាក់ចេញដោយរាជរដ្ឋាភិបាលអាណិត្តទី៧ នៃរដ្ឋសភាព ជាពិសេសកម្មវិធីបណ្តុះបណ្តាលជំនាញដល់យុវជន ១,៥លាននាក់នេះ នឹងបង្កើនកម្លាំងជំនាញក្នុងស្រុកកាន់តែមានច្រើនជាងមុន ពីព្រោះអាចឆ្លើយតបទៅនឹងតម្រូវការពីអ្នកវិនិយោគ ក៏ដូចជាអ្នកបញ្ជាទិញ ឲ្យងាកមកស្គាល់កម្ពុជាឲ្យបានច្រើនថែមទៀត។ លោកសង្ឃឹមទៀតថា តាមរយៈកម្មវិធីនេះ នឹងអាចទាក់ទាញការបញ្ជាទិញកាន់តែច្រើនបន្ថែមទៀត ដើម្បីបង្កើតការងារ និងបង្កើនប្រាក់ចំណូលដល់កម្មករ កម្មការនី។

ឯកឧត្ដម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ នៅក្នុងកម្មវិធីសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ចុះជួបសំណេះសំណាលជាមួយកម្មករនិយោជិតជាង ១ម៉ឺន ៨ពាន់នាក់ នៅនៅខណ្ឌពោធិ៍សែនជ័យ នៅព្រឹកថ្ងៃទី២១ វិច្ឆិកា ឆ្នាំ២០២៣នេះ បានមានប្រសាសន៍ថា កម្មវិធីបណ្តុះបណ្តាលជំនាញនេះ គឺប្រៀបដូចជាការបង្រៀនដល់យុវជនជាក្រុមគោលដៅឲ្យចេះស្ទូចត្រី បន្ថែមពីលើកម្មវិធីបើកផ្តល់ប្រាក់ដល់ក្រុមគ្រួសារក្រីក្រជាង ៧០ម៉ឺនគ្រួសារ ដែលរាជរដ្ឋាភិបាលកំពុងអនុវត្ត ឬនិយាយមួយបែបថាកំពុងផ្តល់ត្រីជូនយុវជនជាក្រុមគោលដៅ និងក្រុមគ្រួសាររបស់ពួកគាត់។ ឯកឧត្តម បានបញ្ជាក់ថា សិស្សដែលបានចុះឈ្មោះចូលរៀន នឹងទទួលបានការសិក្សាដោយមិនបង់ថ្លៃ និងថែមទាំងទទួលបានប្រាក់ឧបត្ថម្ភប្រចាំខែចំនួន ២៨ម៉ឺនរៀល ក្នុងមួយខែផងដែរ។

សូមរំលឹកថា ការបណ្តុះបណ្តាលជំនាញវិជ្ជាជីវៈ និងបច្ចេកទេស គឺជាយន្តការមួយរបស់រាជរដ្ឋាភិបាលកម្ពុជា ក្នុងការលើកកម្ពស់ជីវភាពរបស់ពលរដ្ឋក្រីក្រ និងងាយរហានិភ័យ ដើម្បីប្រែក្លាយពីកម្លាំងពលកម្មអតិពលកម្មក្នុងទីផ្សារទៅជាកម្លាំងពលកម្មដែលមានជំនាញជាក់ដើម្បីបង្កើនផលិតភាពក្នុងសង្វាក់ផលិតកម្មរបស់រោងចក្រសហគ្រាស ក៏ដូចជាការត្រៀមកម្លាំងពលកម្មទាក់ទាញអ្នកវិនិយោគថ្មីៗបន្ថែម៕

អត្ថបទដោយ៖ ឈិត បូរ៉ាវី