ភ្នំពេញ ៖ អាជ្ញាធរជាតិប្រយុទ្ធ នឹងជំងឺអេដស៍ នាព្រឹកថ្ងៃទី២១ ខែវិចិ្ឆកា ឆ្នាំ២០២៣នេះ បានបើកកិច្ចប្រជុំក្រុមប្រឹក្សាបច្ចេកទេសលើកទី១១ ឆ្នាំ២០២៣ តាមប្រព័ន្ធ ZOOM និងដោយផ្ទាល់នៅអាជ្ញាធរជាតិប្រយុទ្ធនឹងជំងឺអេដស៍ ក្នុងគោលបំណងរួមគ្នាដើម្បីកម្ពុជាគ្មានអេដស៍។

​ដោយទទួលបានការអនុញ្ញាតដ៏ខ្ពង់ខ្ពស់ពីឯកឧត្តមទេសរដ្ឋមន្ត្រី អៀង មូលី ទទួលបន្ទុកដឹកនាំអាជ្ញាធរជាតិប្រយុទ្ធ នឹងជំងឺអេដស៍ ឯកឧត្តមបណ្ឌិត ឈឹម ឃិនដារ៉េត អគ្គលេខាធិការ អាជ្ញាធរជាតិប្រយុទ្ធនឹងជំងឺអេដស៍ និងជាប្រធានក្រុមប្រឹក្សាបច្ចេកទេស បានអញ្ជើញដឹកនាំកិច្ចប្រជុំក្រុមប្រឹក្សាបច្ចេកទេសលើកទី១១ ក្នុងកិច្ចប្រជុំនេះដែរ មានការអញ្ជើញចូលរួមពី ឯកឧត្តម លោកជំទាវ លោក លោកស្រី ជាសមាជិក សមាជិកា អញ្ជើញមកពីក្រសួង ស្ថាប័ន រាជធានី ខេត្ត និងអង្គការដៃគូពាក់ព័ន្ធដែលធ្វើការងារអេដស៍ទាំងអស់។ ទន្ទឹមនឹងនោះរបៀបវារៈនៃកិច្ចប្រជុំនេះមាន៖ មតិស្វាគមន៍ និងគោលបំណងនៃកិច្ចប្រជុំដោយ ឯកឧត្តមបណ្ឌិត ឈឹម ឃិន ដារ៉េត អគ្គលេខាធិការអាជ្ញាធរជាតិប្រយុទ្ធនឹងជំងឺអេដស៍ និងជាប្រធានក្រុមប្រឹក្សាបច្ចេកទេស។ បទបង្ហាញស្តីពី “របាយកាណ៍វឌ្ឍនភាពឆ្លើយតប នឹងមេរោគអេដស៍ និងជំងឺអេដស៍ ឆ្នាំ២០២៣” បង្ហាញដោយឯកឧត្តមវេជ្ជបណ្ឌិត ឈា សិទ្ធិ អគ្គលេខាធិការង នៃអាជ្ញាធរជាតិ ប្រយុទ្ធនឹងជំងែអេដស៍។ បទបង្ហាញស្តីពី“សេចក្តីព្រាងផែនការយុទ្ធសាស្រ្តជាតិឆ្លើយតបមេរោគអេដស៍ និងជំងឺអេដស៍ ទូលំទូលាយ និងជាពហុវិស័យលើកទី៦”បង្ហាញដោយ លោកវេជ្ជបណ្ឌិត ទា ផូលី និងសេចក្តីព្រាងស្តីពីគោលការណ៍ណែនាំស្តីពីយន្តការរាយការណ៍ និងឆ្លើយតបនឹងការមាក់ងាយ និងការរើសអើង បង្ហាញជូនដោយលោក អ៊ឹង ប៉ូលីន ទីប្រឹក្សាជាន់ខ្ពស់របស់ UNAIDS។

សូមបញ្ជាក់ផងដែរថា ប្រទេសកម្ពុជា គឺជាប្រទេសមួយក្នុងចំណោមប្រទេសចំនួនប្រាំពីរ នៅលើពិភពលោកដែលសម្រេចបាននូវគោលដៅ ៩០-៩០-៩០ ក្នុងឆ្នាំ២០១៧។ ជាមួយនឹងសមិទ្ធិផល ៨៦-៩៩-៩៨ យើងបានបំពេញការងារបានល្អលើគោលដៅទី២ និងទី៣ នៃគោលដៅ៩៥ ក្នុងឆ្នាំ២០២២ ប៉ុន្តែយើងត្រូវបិទគម្លាតនៅក្នុងគោលដៅ៩៥ ដំបូង។ សេវាកម្ម PrEP បានកើនឡើងពីឆ្នាំ២០១៩ និង២០២៣ ហើយគ្របដណ្តប់អ្នកប្រើប្រាស់ច្រើនជាង១០០០០នាក់ក្នុងឆ្នាំ២០២៣។ ពីឆ្នាំ២០១០ ដល់ឆ្នាំ២០២២ ករណីឆ្លងថ្មីនៃមេរោគអេដស៍បានធ្លាក់ចុះ៣៣% និងខេត្តចំនួន៣ និងរាជធានីភ្នំពេញ បាននិងកំពុងអនុវត្តគម្រោងកម្មវិធីទីក្រុងពន្លឿនការឆ្លើយតបនឹងមេរោគអេដស៍( Fast Track Cities Initiative)៕ អត្ថបទ ៖ រដ្ឋា