លោកនាយករដ្ឋមន្ត្រីអ៊ីស្រាអែល Benjamin Netanyahu កាលពីថ្ងៃអង្គារ ទី២១ ខែវិច្ឆិកា បានស្នើឱ្យរដ្ឋាភិបាលរបស់លោកទទួលយកកិច្ចព្រមព្រៀងមួយសម្រាប់ក្រុមសកម្មប្រយុទ្ធហាម៉ាសប៉ាឡេស្ទីន ក្នុងការដោះលែងចំណាប់ថ្នូរមួយចំនួននៅក្នុងតំបន់ហ្កាហ្សាជាថ្នូរនឹងបទឈប់បាញ់ជាច្រើនថ្ងៃ ទោះបីជាការស្លាប់របស់ចំណាប់ថ្នូរម្នាក់នៅក្នុងការជាប់ឃុំត្រូវបានប្រកាសក៏ដោយ។
មន្ត្រីមកពីប្រទេសកាតា ដែលបាននិងកំពុងសម្របសម្រួលការចរចា ព្រមទាំងសហរដ្ឋអាមេរិក អ៊ីស្រាអែល និងក្រុមហាម៉ាស បាននិយាយជាច្រើនថ្ងៃមកមហើយថា កិច្ចព្រមព្រៀងមួយនឹងកើតឡើង។
មុនពេលប្រមូលផ្តុំជាមួយរដ្ឋាភិបាលពេញលេញរបស់លោក លោក Netanyahu បានជួបជាមួយគណៈរដ្ឋមន្ត្រីសង្គ្រាមរបស់លោកកាលពីថ្ងៃអង្គារ និងគណៈរដ្ឋមន្ត្រីសន្តិសុខជាតិទ្រង់ទ្រាយធំជាងមុន លើកិច្ចព្រមព្រៀងនេះ។ ក្រុមហាម៉ាស ត្រូវបានគេជឿថាកំពុងចាប់ចំណាប់ខ្មាំងជាង ២០០នាក់ ដែលត្រូវបានចាប់ នៅពេលក្រុមអ្នកប្រយុទ្ធរបស់ខ្លួនបានចូលទៅក្នុងប្រទេសអ៊ីស្រាអែលកាលពីថ្ងៃទី ៧ ខែតុលាដោយបានសម្លាប់មនុស្ស ១.២០០នាក់ នេះបើយោងតាមចំនួនសរុបរបស់អ៊ីស្រាអែល។
លោកនាយករដ្ឋមន្ត្រីអ៊ីស្រាអែលបាននិយាយថា អន្តរាគមន៍របស់ប្រធានាធិបតីអាមេរិក Joe Biden បានជួយកែលម្អកិច្ចព្រមព្រៀង ដោយបានរួមបញ្ចូលទាំងចំណាប់ថ្នូរកាន់តែច្រើនសម្រាប់សម្បទានតិចជាងមុន។
ប៉ុន្តែលោក Netanyahu បាននិយាយថា បេសកកម្មកាន់តែទូលំទូលាយរបស់អ៊ីស្រាអែលមិនបានផ្លាស់ប្តូរទេ។ លោកបាននិយាយនៅក្នុងសារថតទុកថានៅពេលចាប់ផ្ដើមកិច្ចប្រជុំរដ្ឋាភិបាលចុងក្រោយថា យើងកំពុងស្ថិតក្នុងសង្រ្គាម ហើយយើងនឹងបន្តសង្រ្គាមរហូតដល់យើងសម្រេចបានរាល់គោលដៅរបស់យើង។
ដើម្បីកម្ទេចក្រុមហាម៉ាស រំដោះចំណាប់ថ្នូររបស់យើងទាំងអស់ និងធានាថាគ្មាននរណាម្នាក់នៅក្នុងតំបន់ហ្កាហ្សាអាចគំរាមកំហែងអ៊ីស្រាអែលបានឡើយ ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
