យោងតាមមន្ត្រីរដ្ឋាភិបាល ចំនួន​អ្នកស្លាប់​ពី​ទឹក​ជំនន់​ដ៏​គំហុក​បណ្ដាល​មក​ពី​ភ្លៀង​ធ្លាក់​ខ្លាំង​នៅ​ប្រទេស​សូម៉ាលី បានកើនឡើងដល់៥០នាក់ ខណៈមនុស្សជិត៧០ម៉ឺននាក់ ត្រូវបានភៀស​ខ្លួន​ចេញ​ពី​លំនៅឋាន ។

មន្ត្រីខាងលើនិយាយថា ខណៈភ្លៀងធ្លាក់ខ្លាំងបានចាប់ផ្ដើមកាលពីថ្ងៃអង្គារ គេរំពឹង​ថា​ស្ថានភាព​លំបាក​របស់​ប្រជាពលរដ្ឋនៅក្នុងប្រទេសនេះ នឹងកាន់តែដុនដាបខ្លាំងថែមទៀត។ 

លោក មហាម៉ូដ ម៉ូលីម អាប់ឌូឡាហី (Mohamud Moalim Abdullahi ) នាយក​ទីភ្នាក់ងារ​គ្រប់​គ្រង​គ្រោះ​មហន្តរាយសូម៉ាលីបាននិយាយនៅក្នុងសន្និសីទសារព័ត៌មានកាលពីថ្ងៃចន្ទថា មនុស្ស ៥០ នាក់បានស្លាប់នៅក្នុងគ្រោះមហន្តរាយនេះ ខណៈ មនុស្ស៦៨៧.២៣៥នាក់ ត្រូវបាន​បង្ខំ​ឱ្យ​ភៀស​ខ្លួន​ចេញ​ពីផ្ទះសម្បែងរបស់ពួកគេ។

ភ្លៀងធ្លាក់ដែលរំពឹងទុកនៅចន្លោះថ្ងៃទី ២១ និង ២៤ខែវិច្ឆិកា អាចនាំឱ្យមាន​ទឹក​ជំនន់​បន្ថែម​ទៀត​ដែល​អាចបណ្តាលឱ្យមនុស្សស្លាប់ និងការបំផ្លិចបំផ្លាញ ។

តំបន់ញ៉ក​អាហ្វ្រិក(Horn of Africa)កំពុងជួបប្រទះភ្លៀងធ្លាក់ខ្លាំង និងទឹកជំនន់​ដោយ​សារ​បាតុ​ភូត​អាកាស​ធាតុអេលនីញ៉ូ (El Nino) ដែលបានសម្លាប់មនុស្សរាប់សិបនាក់ និងបណ្តាល​ឱ្យ​មាន​ការ​ចល័ត​ទីលំនៅទ្រង់ទ្រាយធំ រួមទាំងនៅក្នុងប្រទេសសូម៉ាលី ជាទីដែលភ្លៀងបានបំផ្លាញស្ពាន និង ជន់លិចតំបន់លំនៅឋានប្រជាជន។

គណៈកម្មាធិការជួយសង្គ្រោះអន្តរជាតិបាននិយាយនៅក្នុងសេចក្តីថ្លែងការណ៍មួយកាលពីថ្ងៃចន្ទថា ទឹកជំនន់ និងភ្លៀងធ្លាក់ខ្លាំងបានបណ្តាលឱ្យមានមហន្តរាយដ៏លំបាក ដល់រាប់​រយ​ពាន់​នាក់​ដែល​បាន​បាត់បង់ផ្ទះសម្បែង និងទ្រព្យសម្បត្តិ ឬសត្វ និងដំណាំរបស់ពួកគេ ដោយបន្ថែម​ថា​មនុស្ស​ជាង ១,៧ លាននាក់កំពុងត្រូវការជំនួយសង្រ្គោះបន្ទាន់៕