ម៉ាលី៖ ប្រជាពលរដ្ឋម៉ាលី បានប្រតិកម្មនឹងការប្រកាសកាលពីថ្ងៃព្រហស្បតិ៍ ដោយប្រធានាធិបតីបារាំង លោក អេមម៉ានូអែល ម៉ាក្រុង ពីការកាត់បន្ថយវត្តមានទាហាននាពេលអនាគតរបស់បារាំង ដែលកំពុងធ្វើសង្គ្រាមជាមួយក្រុមជ្រុលនិយមអ៊ីស្លាម នៅតំបន់សាហេល។
ប្រតិបត្តិការ “បាខេន” របស់បារាំង នឹងបញ្ចប់ជាផ្លូវការ ហើយនិងជំនួសដោយបេសកកម្មមួយទៀត ផ្តោតសំខាន់លើការប្រយុទ្ធជាមួយក្រុមជ្រុលនិយមអ៊ីស្លាម ដែលពឹងផ្អែកច្រើនលើដៃគូក្នុងតំបន់។
លោក ម៉ាម៉ាឌូ សាន់ហ្គែ គឺជាផលិតករវប្បធម៌មួយរូប មកពីរដ្ឋធានីបាម៉ាកូ ប្រទេសម៉ាលី បាននិយាយថា ពួកយើងបានស្វាគមន៍វត្តមានរបស់ក្រុមប្រតិបត្តិការបាខេន ជាមួយនឹងទាហានម៉ាលី អស់រយៈពេលជាច្រើនឆ្នាំមកហើយ។
លោកសានហ្គែ បាននិយាយថា ការដកទ័ពចេញ នឹងក្លាយជាផលប៉ះពាល់ដំបូង និងខ្លាំងបំផុត ដល់កងទ័ពម៉ាលី និងកងទ័ពក្នុងតំបន់សាហេល។
លោក ឆាកកា ខេតា គឺជាពលរដ្ឋមួយរូបរស់នៅក្នុងទីក្រងបាម៉ាកូ បាននិយាយដែរថា វាមិនមែនត្រឹមតែ ប្រទេសម៉ាលី មួយប៉ុណ្ណោះទេ ដែលជួបគ្រោះថ្នាក់ ប៉ុន្តែអាហ្វ្រិកទាំងមូលផងដែរ ។ ពួកយើងត្រូវតែព្រួយបារម្ភ និងប្រុងប្រយ័ត្ន។
សូមបញ្ជាក់ថា ទាហានបារាំង មានវត្តមាននៅក្នុងប្រទេសម៉ាលី ចាប់តាំងពីឆ្នាំ ២០១៣រហូតមក ពេលដែលពួកគេចូលធ្វើអន្តរាគមន៍ ដើម្បីបង្ខំឲ្យក្រុមជ្រុលនិយមអ៊ីស្លាម បាត់បង់អំណាចនៅតាមទីក្រុងជាច្រើន នៅទូទាំងតំបន់ភាគខាងជើងប្រទេសម៉ាលី។
មន្ត្រីកំពូលមួយរូបរបស់បារាំង បាននិយាយថា ពួកគេត្រូវការចំណាយពេលច្រើនខែ ដើម្បីអនុវត្តន៍ការដកទ័ពនេះ៕ អត្ថបទ៖ សារ៉ាត់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
