បេឡាជាតិសន្តិសុខសង្គម ហៅកាត់ ប.ស.ស. បានបញ្ជាក់ថា គិតក្នុងរយៈពេលជិត ៤ខែនេះ រាជ​រដ្ឋាភិបាល​កម្ពុជា បានចំណាយប្រាក់ឧបត្ថម្ភសាច់ប្រាក់ជូនដល់ស្រ្តីមានផ្ទៃពោះ ទាំង​មុន​ពេល​សម្រាល​កូន ពេលសម្រាលកូន និងក្រោយពេលសម្រាលកូនចំនួនសរុបជាង ៦លាន​ដុល្លារ​សហរដ្ឋ​អាមេរិក។

ឯកឧត្តមបណ្ឌិត ហេង សុផាន់ណារិទ្ធ អគ្គនាយករងបេឡាជាតិសន្តិសុខសង្គម នៅក្នុង​ពិធី​ផ្សព្វផ្សាយ​ ស្តីពី​របប​សន្តិសុខ​សង្គម​ផ្នែក​ថែ​ទាំ​សុខ​ភាព​តាម​របប​ភាគ​ទាន​ដោយ​ស័្មគ្រ​ចិត្ត​ សម្រាប់​បុគ្គល​ស្វ័យនិយោជន៍ និងអ្នកក្នុងបន្ទុកសមាជិក ប.ស.ស. និង​កម្ម​វិធី​បណ្តុះ​បណ្តាល​ជំនាញ​វិជ្ជាជីវៈ និងបច្ចេកទេស ដល់យុវជនមកពីគ្រួសារក្រីក្រ និងគ្រួសារងាយរងហានិភ័យ នៅ​ព្រឹក​ថ្ងៃទី​២២ ខែវិច្ឆិកា បានធ្វើសេចក្តីរាយការណ៍ថា តាមរយៈ​ការ​អនុវត្ត​កម្ម​វិធី​ឧបត្ថម្ភ​សាច់​ប្រាក់​ដល់​ស្រ្តី​មាន​ផ្ទៃពោះ ទាំងមុនពេលសម្រាលកូន ពេលសម្រាលកូន និងក្រោយពេល​សម្រាល​កូន​ឲ្យ​បាន​ល្អ ​និងកាន់តែមានភាពងាយស្រួល គិតចាប់ពីថ្ងៃទី១ ខែសីហា ដល់ថ្ងៃទី២១ ខែវិច្ឆិកា ឆ្នាំ​២០២៣ មានកម្មការនី មន្រ្តីរាជការ មន្រ្តីកិច្ចសន្យាជាស្រ្តីសម្រាលកូនចំនួន ១ម៉ឺន ៩ពាន់ ១៨​នាក់​ ក្នុងនោះកូនចំនួន ១ម៉ឺន ៩ពាន់ ១៥១នាក់ ដោយបានទៅពិនិត្យសុខភាពមុន ក្រោយ​សម្រាល ពេលសម្រាល និងចាក់វ៉ាក់សាំងសរុបចំនួន ៥ម៉ឺន ៩ពាន់ ៧៨នាក់ ដែលគ្រាន់តែជិត ៤​ខែ​នេះ រាជរដ្ឋាភិបាលបានចំណាយថវិកាជាង ៦លានដុល្លារសហរដ្ឋអាមេរិក។

ឯកឧត្តម បានបន្តថា តាមរយៈគោលនយោបាយប្រាក់ឧបត្ថម្ភនេះ សបញ្ជាក់ឲ្យឃើញថា រាជ​រដ្ឋាភិបាល​មិន​ត្រឹម​គិតគូរ​ទៅដល់កម្មករនិយោជិតដែលកំពុងធ្វើការងារនោះទេ ថែម​ទាំង​បាន​គិតគូរ​ទៅ​ដល់​សុខភាព និងការរីកលូតលាស់នៃកូនរបស់កម្មករនិយោជិតផងដែរ ដែល​ធ្វើ​ឲ្យ​កម្មករ​និយោជិត​កាន់​តែ​មាន​ជំនឿ​ និង​ជឿជា​ក់​ទៅ​លើ​ការ​រីក​ចម្រើន​លូត​លាស់​របស់​កូន​ទៅ​ថ្ងៃ​អនាគត​។

សូមបញ្ជាក់ថា ក្រៅពីការបើកផ្តល់ប្រាក់ឧបត្ថម្ភជូនដល់ស្រ្តីមានផ្ទៃពោះ ទាំង​មុន​ពេល​សម្រាល​កូន ពេលសម្រាលកូន និងក្រោយពេលសម្រាលកូននេះ រាជរដ្ឋាភិបាលកម្ពុជា ក្នុងអាណិត្តទី៧ នៃ​រដ្ឋសភា បានណែនាំឲ្យក្រសួងការងារ និងបណ្តុះបណ្តាលវិជ្ជាជីវៈ សហការ​ជាមួយ​ក្រសួង​ពាក់ព័ន្ធ និងតំណាងភាគីនិយោជក និងតំណាងភាគីកម្មករនិយោជិត រួមគ្នា​សិក្សា​លទ្ធភាព​បង្កើត​ទារកដ្ឋាន និងមតេ្តយ្យសហគមន៍នៅតាមតំបន់ដែលមានរោងចក្រ ដើម្បី​គិត​អំពី​យន្តការ នៃ​ការ​កសាង ការគ្រប់គ្រង ការធានាគុណភាព និងការរក្សានិរន្តភាពនៃទារកដ្ឋាន និងមត្តេយ្យ​សហគមន៍​នៅ​តំបន់រោងចក្រផងដែរ ដើម្បីផ្តល់ភាពងាយស្រួលដល់កម្មករ កម្មការិនី បាន​យក​កូន​ៗ​របស់ខ្លួនទៅទទួលសេវាថែទាំ និងអប់រំបានត្រឹមត្រូវ៕ អត្ថបទ៖ ឈិត បូរ៉ាវី