រយៈពេលបីខែនេះ រាជរដ្ឋាភិបាលថ្មី ក្នុងអាណត្តិទី៧នេះ សម្រេចបាននូវលទ្ធផលជាក់ស្តែងលើគោលនយោបាយសំខាន់ៗ សម្រាប់សង្គមជាតិជាច្រើន និងបានពង្រឹង ពង្រីកទំនាក់ទំនងកាទូតជាមួយបណ្ដាប្រទេសជាមិត្តឱ្យកាន់តែរឹងមាំ។
ថ្លែងក្នុងវេទិកាដែលរៀបចំដោយអង្គភាពអ្នកនាំពាក្យរាជរដ្ឋាភិបាលស្តីពី លទ្ធផលការងារក្នុងរយៈពេល៣ខែរបស់រាជរដ្ឋាភិបាល ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នៅថ្ងៃទី២១ ខែវិច្ឆិកា ឆ្នាំ២០២៣ ឯកឧត្តម ប៉ែន បូណា ប្រធានអង្គភាពអ្នកនាំពាក្យរាជរដ្ឋាភិបាលបានថ្លែងថា គិតត្រឹមថ្ងៃទី ២២ ខែវិច្ឆិកានេះ មានរយៈពេល៣ខែគត់នៃការចាប់ផ្តើមបំពេញការងាររបស់ រាជរដ្ឋាភិបាលអណត្តិទី៧ ដឹកនាំដោយសម្តេចធិបតី ហ៊ុន ម៉ាណែត ដែលសមិទ្ធផលសម្រេចបានធំធេង ហួសពីការស្មានពីព្រោះក្រោយពីរាជរដ្ឋាភិបាលកើតភ្លាម ធ្វើការភ្លាម ហើយធ្វើដោយសកម្មមានឆន្ទៈមោះមុត និងប្រកបដោយចក្ខុវិស័យ។
ដោយឡែកចំពោះកិច្ចការទូតនៅក្រៅប្រទេស ឯកឧត្តម ហង្ស់ ហ្រ្វង់ស័រតាន់ រដ្ឋមន្រ្តីប្រតិភូអមនាយករដ្ឋមន្រ្តីទទួលបន្ទុកកិច្ចការបរទេស បញ្ជាក់ថា ៣ខែនៃដំណើរការនយោបាយការបរទេសរបស់សម្តេចធិបតី ហ៊ុន ម៉ាណែត បង្ហាញចំណុច៣សំខាន់ជាស្នូល ទី១ការទូតសកម្ម ទី២ ការទូតសេដ្ឋកិច្ច និងទី៣សារនយោយបាយ។
ក្រៅពីផ្លែផ្កាពីនយោបាយការទូតនៅក្រៅប្រទេស សមិទ្ធផលទី១ របស់រាជរដ្ឋាភិបាល គឺការរក្សាបាននូវសន្តិភាព ស្ថិរភាពសង្គមនយោបាយ សេដ្ឋកិច្ច និងដំណើរការជាប្រក្រតីនៃរដ្ឋបាលសាធារណៈ ទី២ការអភិវឌ្ឍមូលធនមនុស្ស ការធ្វើពិពិធកម្មសេដ្ឋកិច្ច និងបង្កើតភាពប្រកួតប្រជែង ទី៣ បង្កើតអាជ្ញាធរដោះស្រាយវិវាទក្រៅប្រព័ន្ធតុលាការ ទី៤ ការចុះជួបសំណេះសំណាលជាមួយកម្មករ ដោះស្រាយបញ្ហានានា ទី៥ ការអនុម័តលើសេចក្តីព្រាងច្បាប់បម្រើដល់ផលប្រយោជន៍ជាតិ និងប្រជាជន និងទី៦ វេទិការាជរដ្ឋាភិបាលជាមួយវិស័យឯកជន ទេសចរណ៍ និងអចលនទ្រព្យ៕ អត្ថបទ៖ សេក ឧត្តម
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
