ថ្ងៃនេះក្រុមប្រឹក្សាធម្មនុញ្ញ បានដឹកនាំកិច្ចប្រជុំស្តាប់ការបំភ្លឺរបស់តំណាងរដ្ឋសភា ស្តីពីវិសោធនកម្មលើប្រការមួយចំនួននៃបទបញ្ជាផ្ទៃក្នុងរដ្ឋសភា។
ឯកឧត្តមកិត្តិនីតិកោសលបណ្ឌិត អ៊ឹម ឈុនលឹម ប្រធានក្រុមប្រឹក្សាធម្មនុញ្ញ នៅថ្ងៃទី២២ ខែវិច្ឆិកា ឆ្នាំ២០២៣ បានដឹកនាំកិច្ចប្រជុំជួបជាមួយតំណាងរដ្ឋសភា ដែលអញ្ជើញចូលរួមដោយឯកឧត្តម អង្គ វង្សវឌ្ឍនា ដើម្បីស្តាប់ការបំភ្លឺជុំវិញវិសោធនកម្មប្រការ៤ថ្មី, ប្រការ៦ថ្មី (ពីរ) និងប្រការ២៩ថ្មីនៃបទបញ្ជាផ្ទៃក្នុងរបស់រដ្ឋសភា ដែលរដ្ឋសភាបានអនុម័តកាលពីថ្ងៃទី១៦ ខែវិច្ឆិកា ឆ្នាំ២០២៣ នាសម័យប្រជុំលើកទី១ នីតិកាលទី៧។
បើតាមសេចក្តីថ្លែងហេតុរបស់រដ្ឋសភា បទបញ្ជាផ្ទៃក្នុងនៃរដ្ឋសភា នៃព្រះរាជាណាចក្រកម្ពុជា ដែលប្រកាសឱ្យប្រើប្រាស់ នៅថ្ងៃទី ២៧ ខែតុលា ឆ្នាំ១៩៩៣ ត្រូវបានធ្វើវិសោធនកម្មជាបន្តបន្ទាប់ចំនួន១១លើក ក្នុងគោលបំណងឱ្យខ្លឹមសារមាន សង្គតិភាពទៅនឹងបទប្បញ្ញត្តិនៃរដ្ឋធម្មនុញ្ញ និងច្បាប់ជាធរមាន ព្រមទាំងសមស្របតាមស្ថានភាពជាក់ស្តែង។ ម្យ៉ាងទៀតច្បាប់មួយចំនួនពាក់ព័ន្ធនឹងការបង្កើតក្រសួង ស្ថាប័ន ចំណុះរាជរដ្ឋាភិបាល នីតិកាលទី៧ នៃរដ្ឋសភា និងឈ្មោះគណៈកម្មការជំនាញនៃរដ្ឋសភាមួយចំនួន ពុំទាន់សមស្របនឹងវិស័យទទួលខុសត្រូវ របស់គណៈកម្មការនានានៃរដ្ឋសភានៅឡើយ ព្រមទាំងបទពិសោធន៍របស់រដ្ឋសភា និងការវិវត្តរបស់ស្ថាប័ន រដ្ឋសភា ដែលចំណុចនេះតម្រូវឱ្យធ្វើវិសោធនកម្មបទបញ្ជាផ្ទៃក្នុងនៃរដ្ឋសភា ចំនួន៣ប្រការខាងលើបន្ថែមទៀត។
ក្រោយកិច្ចប្រជុំនៅថ្ងៃនេះ ក្រុមប្រឹក្សាធម្មនុញ្ញបានសម្រេចកំណត់យកថ្ងៃទី២៣ ខែវិច្ឆិកាស្អែកនេះ ដើម្បីបើកកិច្ចប្រជុំពេញអង្គរបស់ខ្លួនក្នុងការពិនិត្យនូវធម្មនុញ្ញភាពលើសំណើវិសោធនកម្មច្បាប់នេះ មុនបញ្ជូនថ្វាយព្រះមហាក្សត្រឡាយព្រះហស្ថលេខា៕ អត្ថបទ៖ សេក ឧត្តម
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
