ភ្នំពេញ ៖ ក្រុមប្រឹក្សារាជធានី-ខេត្ត រៀបចំវគ្គបណ្តុះបណ្តាល ស្តីពី ការតម្រង់ទិសដល់សមាជិក និងការផ្ទេរមុខងារទៅរដ្ឋបាលថ្នាក់ក្រោមជាតិ។

ក្រុមប្រឹក្សារាជធានី-ខេត្ត នៅព្រឹកថ្ងៃទី២២ ខែវិច្ឆិកា ឆ្នាំ២០២៣ បានរៀបចំវគ្គបណ្តុះបណ្តាលស្តីពីការតម្រង់ទិសដល់សមាជិកក្រុមប្រឹក្សារាជធានី-ខេត្ត និងការផ្ទេរមុខងារទៅរដ្ឋបាលថ្នាក់ក្រោមជាតិ ដែលមាន សមាជិកក្រុមប្រឹក្សាចូលរួម ៩៤នាក់ មកពីខេត្តកំពង់ស្ពឺ ខេត្ដកោះកុង និងងរាជធានី ដោយរាជធានីភ្នំពេញធ្វើជាម្ចាស់ផ្ទះ នៅសាលារាជធានីភ្នំពេញ ក្រោមអធិបតីភាព ឯកឧត្តម ម៉ប់ សារិន ប្រធានក្រុមប្រឹក្សារាជធានីភ្នំពេញ។

ឯកឧត្តម ម៉ប់ សារិន មានប្រសាសន៍ថា ការតម្រង់ទិសដល់សមាជិកក្រុមប្រឹក្សារាជធានី-ខេត្ត និងការផ្ទេរមុខងារទៅរដ្ឋបាលថ្នាក់ក្រោមជាតិ ជាការងារសំខាន់នឹងចាំបាច់ស្របតាមយុទ្ធសាស្រ្ដបញ្ចកោណរបស់រាជរដ្ឋាភិបាល អាណត្ដទី៧ ដែលដឹកនាំដោយសម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដី។ វគ្គបណ្ដុះបណ្ដាលនេះនឹងប្រែក្លាយសមាគមជាតិ ជាមជ្ឈមណ្ឌលអភិវឌ្ឍន៍សមត្ថភាព ដល់សមាជិកក្រុមប្រឹក្សារាជធានី-ខេត្ត និងជាស្ថាប័នផ្តល់ជំនាញ តម្លៃវិជ្ជាជីវៈ អាកប្បកិរិយា និងលើកកម្ពស់សមត្ថភាពដល់ក្រុមប្រឹក្សា ដើម្បីដឹកនាំ និងសម្របសម្រួលក្នុងដែនរដ្ឋបាលរបស់ខ្លួនប្រកបដោយប្រសិទ្ធភាព និងភាពសក្ដិសិទ្ធ។

ឯកឧត្តម ម៉ប់ សារិន បន្ថែមថា ការងារបច្ចុប្បន្នក្រុមប្រឹក្សារាជធានីភ្នំពេញបានដាក់ចេញជាគោលការណ៍ក្នុងការរៀបចំបែងចែកភារកិច្ចជូនដល់សមាជិក-សមាជិកាក្រុមប្រឹក្សារាជធានីភ្នំពេញជា ៥ផែនឱ្យទទួលខុសត្រូវលើការងារប្រាស្រ័យទាក់ទង និងសហការជាមួយក្រុមប្រឹក្សាខណ្ឌ ក្រុមប្រឹក្សាសង្កាត់ មន្ទីរអង្គភាពជំនាញជុំវិញរដ្ឋបាលរាជធានីភ្នំពេញ ទីចាត់ការ អង្គភាពនានាចំណុះរដ្ឋបាលរាជធានីភ្នំពេញ វិស័យឯកជន អង្គការសង្គមស៊ីវិល និងប្រជាពលរដ្ឋនៅតាមសហគមន៍ក្នុងដែនសមត្ថកិច្ចទទួលខុសត្រូវ ហើយផែនការទាំង៥រួម ទាំងគណៈកម្មាធិការកាតព្វកិច្ចទាំង៣ និងការិយាល័យប្រជាពលរដ្ឋរបស់ក្រុមប្រឹក្សាត្រូវបានធ្វើរបាយការណ៍ជូនក្នុងកិច្ចប្រជុំសាមញ្ញក្រុមប្រឹក្សា។

ឯកឧត្តម យឹម សុខុម ប្រធានក្រុមប្រឹក្សាខេត្ដកំពង់ស្ពឺ និងជាអនុប្រធានអចិន្ត្រៃយ៍សមាគមជាតិក្រុមប្រឹក្សារាជធានី-ខេត្ដ បានមានប្រសាសន៍ថា វគ្គបណ្តុះបណ្តាលដែលរៀបចំធ្វើឡើងនៅរាជធានីភ្នំពេញនេះ ជាវគ្គបណ្តុះបណ្តាលលើកទី១ នៅកម្រងទី១ ដោយកំណត់យករាជធានីភ្នំពេញជាទីកន្លែងនៃការផ្ដល់វគ្គបណ្តុះបណ្តាល និងបានបង្ហាញឱ្យឃើញកាន់តែច្បាស់អំពីកិច្ចខិតខំប្រឹងប្រែង និងការយកចិត្តទុកដាក់ក្នុងការចូលរួមអនុវត្តតួនាទី ភារកិច្ច ក្នុងនាមជាសមាជិកសមាគមជាតិក្រុមប្រឹក្សារាជធានី-ខេត្ត ដើម្បីសម្រេចឱ្យបាននូវផែនការយុទ្ធសាស្ត្រ ៥ឆ្នាំដំណាក់កាលទី២ ឆ្នាំ២០១៩- ២០២៣ របស់សមាគមជាតិ ដោយក្នុងនោះបានកំណត់យុទ្ធសាស្ត្រទី២ ការអភិវឌ្ឍសមត្ថភាព គឺជាសេវាស្នូលដែលសមាគមជាតិត្រូវផ្ដល់ដល់សមាជិកសមាគម៕ អត្ថបទ ៖ ប្រាក់ វ៉ាន់ដា