ភ្នំពេញ ៖ បន្ទាប់ពីបានហ្វឹកហ្វឺនរួមគ្នាអស់រយៈពេល៩ថ្ងៃ ការធ្វើសមយុទ្ធពហុសាសន៍ ដែលមានឈ្មោះថា «សន្តិភាពមិត្តភាព-ឆ្នាំ២០២៣» នៅក្រុងចាំងជាំង ខេត្តក្វាងតុង ភាគខាងត្បូងប្រទេសចិន បានបិទបញ្ចប់ហើយនៅព្រឹកថ្ងៃទី២២ ខែវិច្ឆិកា ឆ្នាំ២០២៣នេះ ក្រោមអធិបតីភាពមេបញ្ជាការជាន់ខ្ពស់ នៃបណ្តាប្រទេសចូលរួមទាំង៦ ដែលមានភាគីចិនជាម្ចាស់ផ្ទះ កម្ពុជា ម៉ាឡេស៊ី ឡាវ ថៃ និងវៀតណាម។

នាយឧត្តមសេនីយ៍ វង្ស ពិសេន អគ្គមេបញ្ជាការ នៃកងយោធពលខេមរភូមិន្ទ ដែលបានអញ្ជើញជាអធិបតីក្នុងពិធីបិទសមយុទ្ធនោះ បានថ្លែងអំណរគុណកងទ័ពរំដោះប្រជាជនចិន ចំពោះការផ្តួចផ្តើមធ្វើជាម្ចាស់ផ្ទះសមយុទ្ធពហុសាសន៍នេះឡើង ក្នុងគោលបំណងពង្រឹងទំនាក់ទំនងរវាងបណ្តាប្រទេសនៅក្នុងតំបន់ សំដៅជំរុញកិច្ចសហប្រតិបត្តិការយោធា និងចក្ខុវិស័យសន្តិសុខរួមគ្នានៅក្នុងតំបន់។

នាយឧត្តមសេនីយ៍ វង្ស ពិសេន បានវាយតម្លៃការធ្វើសមយុទ្ធរួមគ្នានេះថា ជានិម្មិតរូបនៃកិច្ចសហប្រតិបត្តិការដ៏រឹងមាំរវាងប្រទេស និងកងទ័ពទាំង៦ប្រទេសដែលបានចូលរួម ហើយពិតជាផ្តល់នូវសារសំខាន់ក្នុងការលើកកម្ពស់សមត្ថភាព និងការយល់ដឹងបន្ថែមទៀតដល់កងទ័ព ដូចជាការផ្លាស់ប្តូរបទពិសោធន៍គ្នាទៅវិញទៅមក របៀបដឹកនាំបញ្ហាយុទ្ធវិធីផ្សេងៗគ្នា, យុទ្ធោបករណ៍, បច្ចេកទេស ,និងជំនាញថ្មីៗជាដើម។ 

ទន្ទឹមនឹងនេះដែរសមយុទ្ធក៏បានធ្វើឱ្យកងទ័ពបណ្តាប្រទេសដែលបានចូលរួមពង្រឹងបាននូវទំនាក់ទំនងល្អ បង្កើនចំណងសាមគ្គីភាព ចេះសម្របសម្រួល រស់នៅ និងធ្វើការងាររួបគ្នាជាមួយជាតិសាសន៍ដទៃក្នុងពេលធ្វើប្រតិបត្តិការរួម ដើម្បីឆ្លើយតបឲ្យមានប្រសិទ្ធភាព និងទាន់ពេលវេលាក្នុងប្រតិបត្តិការទាំងថ្នាក់ជាតិ និងអន្តរជាតិ ចូលរួមទប់ស្កាត់ និងដោះស្រាយបញ្ហាប្រឈមនានាដែលអាចកើតមានជាយថាហេតុណាមួយនោះ។

នៅក្នុងកម្មវិធីបិទនោះ នាយឧត្តមសេនីយ៍ វង្ស ពិសេន ក៏បានសម្តែងការជឿជាក់ថា សមយុទ្ធពហុសាសន៍ ដែលមានឈ្មោះថា«សន្តិភាព មិត្តភាព-ឆ្នាំ២០២៣»នេះ នឹងបន្តរីកចម្រើនជាលំដាប់ និងមានការចូលរួមពីបណ្តាប្រទេសនានា នៅក្នុងតំបន់ឲ្យកាន់តែច្រើនបន្ថែមទៀតនាពេលអនាគត ដើម្បីរួមចំណែកដល់ការថែរក្សាសន្តិភាព ស្ថិរភាព និងវិបុលភាពក្នុងតំបន់ ក៏ដូចជាពិភពលោក។

 សូមបញ្ជាក់ថានេះ គឺជាលើកទីមួយដែលប្រទេសចិនបានរៀបចំធ្វើសមយុទ្ធ «សន្តិភាព មិត្តភាព» នេះឡើង ក្នុងគោលបំណងលើកកំពស់សមត្ថភាពភាគីដែលចូលរួម សម្រាប់ប្រតិបត្តិការប្រឆាំងភេរវកម្មនៅទីក្រុង និងដែនសមុទ្រប្រតិបត្តិការប្រឆាំងការលួចឆ្លងដែន ដើម្បីបង្កើនទំនុកចិត្តគ្នាខាងយោធា និងកិច្ចសហប្រតិបត្តិការជាក់ស្តែងជាដើម៕ អត្ថបទ ៖ បាន ចក់​