ប៉ាគីស្ថាន៖ យោងតាមការអះអាង របស់ក្រុមនគរបាល និងក្រុមមន្ត្រី បានឲ្យដឹងថា រថយន្តក្រុងល្បឿនលឿនមួយគ្រឿង ដឹកក្រុមធម្មយាត្រា បានក្រឡាប់នៅលើផ្លូវហាយវ៉េ និងធ្លាក់ចូលជ្រោះនៅតំបន់ដាច់ស្រយាល ស្ថិតនៅភាគនិរតីប្រទេសប៉ាគីស្ថាន មុនពេលព្រះអាទិត្យរះនាព្រឹកថ្ងៃសុក្រនេះ ដោយបានសម្លាប់មនុស្សយ៉ាងហោច ២០នាក់ និងមនុស្ស ៥០នាក់ផ្សេងទៀតរងរបួស។
នគរបាលក្នុងស្រុក បាននិយាយថា ឧប្បត្តិហេតុគ្រោះថ្នាក់រថយន្តក្រុង បានកើតឡើងនៅក្នុងស្រុក ឃូសដា ស្ថិតក្នុងខេត្តបាលូឈីស្ថាន។
ក្រុមជួយសង្គ្រោះ បានដឹកជញ្ជូនសាកសព និងអ្នករងរបួសទៅកាន់មន្ទីរពេទ្យរដ្ឋ និងមន្ទីរពេទ្យយោធា។
លោកសា ចាហាន់ គឺជាវេជ្ជបណ្ឌិតប្រចាំទីស្នាក់ការស្រុកឃូសដា បាននិយាយថា អ្នករងរបួសមួយចំនួន កំពុងស្ថិតក្នុងស្ថានភាពធ្ងន់ធ្ងរ។
អ្នកដំណើរម្នាក់ដែលរងរបួស បាននិយាយប្រាប់ទីភ្នាក់ងារព័ត៌មាន APថា ពួកគេបាននិយាយប្រាប់ហើយប្រាប់ទៀតដល់តៃកុងថាឲ្យប្រុងប្រយ័ត្នជាងនេះ។
លោកបានបន្ទោសតៃកុងរថយន្តក្រុងសម្រាប់ឧប្បត្តិហេតុកើតឡើង ដោយសារតៃកុងរូបនោះ ចូលចិត្តស្តាប់ភ្លេង និងបើកបរដោយគ្មានការប្រុងប្រយ័ត្ន។
មន្ត្រីពង្រឹងច្បាប់មួយរូប បានចោទប្រកាន់ដូចគ្នាថាតៃកុងថយន្តក្រុង ធ្វេសប្រហែលទើបបណ្តាលឲ្យគ្រោះថ្នាក់នេះកើតឡើង ប៉ុន្តែលោកបាននិយាយថា ក្រុមអាជ្ញាធរ កំពុងបើកការស៊ើបអង្កេតលើករណីមួយនេះ ។
គួរឲ្យដឹងថា ឧប្បត្តិតហេតុគ្រោះថ្នាក់តាមផ្លូវ បានក្លាយជារឿងធម្មតាទៅហើយនៅប្រទេសប៉ាគីស្ថាន ដោយសារហេដ្ឋារចនាសម្ព័ន្ធផ្លូវអន់៕ អត្ថបទ៖ សារ៉ាត់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
