អតីតអនុឧត្តមនាវីឯកមា្នក់នៃកងកម្លាំងស្វ័យការពារដែនសមុទ្ររបស់ប្រទេសជប៉ុន និយាយថា ការប៉ុនប៉ងរបស់កូរ៉េខាងជើង ក្នុងការដាក់ផ្កាយរណបទៅក្នុងគន្លងតារាវិថី ប្រហែលជាមិនទាន់ទទួលបានជោគជ័យនោះទេ។

លោក Koda Yoji បានប្រាប់ថា ផ្កាយរណបឈ្លបយកការណ៍ ជាទូទៅមានរយៈកម្ពស់ពី ៤០០ ទៅ ៥០០គីឡូម៉ែត្រពីភពផែនដី។ ដូច្នេះ លោកបានបញ្ជាក់ថា ប្រសិនបើផ្កាយរណបនោះធ្វើដំណើរ រវាងប៉ូលខាងជើង និងប៉ូលខាងត្បូងនោះ វានឹងត្រូវបញ្ចប់ការចូលទៅក្នុងគន្លងប៉ូល ក្នុងរយៈពេលប្រហែល ៩០នាទី។

លោក Koda បាននិយាយបន្ថែមថា សញ្ញាអេឡិចត្រូនិកពីផ្កាយរណបរបស់កូរ៉េខាងជើង មិនត្រូវបានរកឃើញរយៈពេលជិត ២ម៉ោង បន្ទាប់ពីការបាញ់បង្ហោះនោះ ដោយលោកបានសង្កត់ធ្ងន់ថា កងកម្លាំងអវកាសអាមេរិកអាចទទួលបានទិន្នន័យ ប្រសិនបើផ្កាយរណបនោះ បានចូលទៅក្នុងគន្លងតារាវិថី ប៉ុន្តែវាហាក់បីដូចជាវាមិនទាន់កើតឡើងនៅឡើយទេ។

យ៉ាងណាក្ដី លោក Koda បាននិយាយដោយប្រយ័ត្នប្រយែងថា លោកមិនអាចសន្និដ្ឋានបានទេនៅចំណុចនេះ ប៉ុន្តែបន្ថែមថា «វានៅតែលឿនពេក ក្នុងការវិនិច្ឆ័យថា តើការបាញ់បង្ហោះនោះ បានជោគជ័យ ឬអត់»។

ជាមួយគ្នានេះ អតីតអនុឧត្តមនាវីឯករូបនេះ បាននិយាយថា មិនមានអ្វីគួរឲ្យសង្ស័យនោះទេ ដែលថា រុស្ស៊ីបានផ្តល់ជំនួយបច្ចេកទេស។ ប៉ុន្តែលោកបានប្រាប់ថា ទោះបីជាមានការផ្ដល់ជំនាញពីរុស្ស៊ីក៏ដោយ ក៏វានឹងមិនមែនជារឿងងាយស្រួល ដែលកូរ៉េខាងជើងអាចកំណត់ពីមូលហេតុនៃការបរាជ័យ អំឡុងការបាញ់បង្ហោះកាលពីខែសីហា ហើយធ្វើការកែសម្រួលបានយ៉ាងល្អឥតខ្ចោះ ក្នុងរយៈពេលត្រឹមតែ ៣ខែនោះ។

សូមបញ្ជាក់ថា ទីក្រុងព្យុងយ៉ាងបាននិយាយថា ខ្លួនបានដាក់ផ្កាយរណបចារកម្មដំបូងរដោយជោគជ័យនៅក្នុងគន្លងតារាវិថី កាលពីថ្ងៃអង្គារ (ទី២១ ខែវិច្ឆិកា) ហើយបានប្តេជ្ញាថា នឹងបាញ់បង្ហោះបន្ថែមទៀត នាពេលអនាគតដ៏ខ្លីខាងមុខនេះ ដោយប្រឆាំងនឹងការថ្កោលទោសជាអន្តរជាតិពីសហរដ្ឋអាមេរិក និងសម្ព័ន្ធមិត្ត៕