កោះតៃវ៉ាន់មិនអាចមានភាពវឹកវរ ឬ «ការដកពិសោធន៍» ក្នុងតំណែងមេដឹកនាំបានទេ នេះបើតាមបេក្ខជននាំមុខក្នុងការក្លាយជាមេដឹកនាំបន្ទាប់របស់កោះតៃវ៉ាន់ បាននិយាយនៅថ្ងៃពុធ (២២ វិច្ឆិកា) នេះ ខណៈដែលបក្សប្រឆាំងនៅតែជាប់គាំងនៅក្នុងជម្លោះដ៏ជូរចត់លើការប្រជែងតំណែងមេដឹកនាំរួមគ្នា។

ការបោះឆ្នោតនៅថ្ងៃទី១៣ ខែមករា ខាងមុខនេះនឹងបង្ហាញពីទំនាក់ទំនងរបស់កោះតៃវ៉ាន់ ជាមួយទីក្រុងប៉េកាំង នៅពេលដែលចិន បានបង្កើនសម្ពាធផ្នែកយោធាដើម្បីអះអាងពីការទាមទារអធិបតេយ្យភាពរបស់ខ្លួន។

មេដឹកនាំលំដាប់ទី២ របស់កោះតៃវ៉ាន់ លោក Lai Ching-te នៃគណបក្សប្រជាធិបតេយ្យ (DPP) កំពុងកាន់អំណាច ដែលចិនចាត់ទុកជាអ្នកផ្ដាច់ខ្លួន បាននាំមុខការស្ទង់មតិក្នុងការក្លាយជាមេដឹកនាំបន្ទាប់របស់កោះតៃវ៉ាន់។ កិច្ចពិភាក្សារវាងគណបក្សប្រឆាំងធំៗទាំងពីរដើម្បីបង្កើតជាក្រុម និងទប់ទល់ជាមួយលោក Lai បានជួបបញ្ហា និងស្ថិតក្នុងភាពជាប់គាំង។

គណបក្សប្រឆាំងដ៏សំខាន់របស់កោះតៃវ៉ាន់ គឺគណបក្ស គូមីនតាំង (KMT) ដែលគាំទ្រទំនាក់ទំនងជិតស្និទ្ធជាមួយទីក្រុងប៉េកាំង បានយល់ព្រមជាមួយគណបក្សប្រជាជនតៃវ៉ាន់ (TPP) កាលពីសប្តាហ៍មុន ក្នុងការរួមគ្នាដើម្បីទប់ទល់នឹងលោក Lai ។

ប៉ុន្តែភាគីទាំងពីរមិនអាចយល់ស្របគ្នាពីមធ្យោបាយបកស្រាយការស្ទង់មតិលើបេក្ខជនរបស់ពួកគេគឺ លោក ហួរ យុអ៊ីស (Hou Yu-ih) នៃគណបក្ស គូមីនតាំង និងលោក កូ វ៉ិនជេ (Ko Wen-je) នៃបក្សប្រជាជនតៃវ៉ាន់ ថាគួរតែឲ្យអ្នកឈរឈ្មោះជាមេដឹកនាំ និងអ្នកណាជាមេដឹកនាំលំដាប់ទីពីរ៕