បន្ទាប់ពីមានការវាយប្រហារលើប្រព័ន្ធអ៊ីនធឺណិតជាបន្តបន្ទាប់ អូស្ត្រាលីនឹងផ្តល់ការត្រួតពិនិត្យនូវភាពល្អប្រសើររបស់ប្រព័ន្ធអ៊ីនធឺណិត សម្រាប់ក្រុមហ៊ុនតូចៗ បង្កើនការផ្តល់មូលនិធិលើការអនុវត្តច្បាប់តាមប្រព័ន្ធអ៊ីនធឺណិត និងណែនាំនូវការរាយការណ៍ជាចាំបាច់នៃការវាយប្រហារដោយមេរោគ ក្រោមការកែប្រែច្បាប់សន្តិសុខ ដែលបានប្រកាស នៅថ្ងៃពុធ (ទី២២ ខែវិច្ឆិកា) នេះ។

រដ្ឋាភិបាលសហព័ន្ធបាននិយាយថា ខ្លួនក៏នឹងនឹងដាក់បទប្បញ្ញត្តិស្តីពីការរាយការណ៍តាមអ៊ីនធឺណិតយ៉ាងតឹងរ៉ឹងលើក្រុមហ៊ុនទូរគមនាគមន៍ ដែលទាក់ទងនឹងហេដ្ឋារចនាសម្ព័ន្ធសំខាន់ៗ ស្វែងរកជនអន្តោប្រវេសន៍ដើម្បីលើកកម្ពស់កម្លាំងពលកម្មសន្តិសុខ និងដាក់កម្រិតលើការចែករំលែកទិន្នន័យអន្តរកម្ម ដើម្បីជំរុញឲ្យមានអ្នករាយការណ៍អំពីឧប្បត្តិហេតុនានា។

ផែនការនេះ ដែលមានទំហំទឹកប្រាក់ ៥៨៧លានដុល្លារអូស្ត្រាលី (៣៨២លានដុល្លារអាមេរិក) បង្ហាញពីរដ្ឋាភិបាលនៃគណបក្សការងារកណ្តាល-ឆ្វេង ដែលកំពុងព្យាយាមនាំមុខគេ បន្ទាប់ពីរយៈពេល ១ឆ្នាំ ដែលស្ទើរតែពាក់កណ្តាលនៃចំនួនប្រជាជន ២៦លាននាក់របស់ប្រទេសនេះ ត្រូវបានលួចព័ត៌មានផ្ទាល់ខ្លួនដោយគ្រាន់តែរំលោភបំពានលើទិន្នន័យចំនួន២ នៅក្រុមហ៊ុនជាច្រើន ខណៈដែលការវាយប្រហារតាមប្រព័ន្ធអ៊ីនធឺណិត នៅឯប្រតិបត្តិករកំពង់ផែដ៏ធំបំផុតរបស់ប្រទេស ក្នុងខែនេះ បាននាំឲ្យខ្សែច្រវាក់ផ្គត់ផ្គង់ជាប់គាំង។

របាយការណ៍ស្តីពីឧក្រិដ្ឋកម្មតាមអ៊ីនធឺណិត នៅក្នុងប្រទេសអូស្ត្រាលី បានកើនឡើងជិត ១ភាគ៤ រហូតដល់ខែមិថុនា ក្នុងឆ្នាំនេះ ជាមួយនឹងការចំណាយជាមធ្យមដល់ជនរងគ្រោះកើនឡើង ១៤ភាគរយ។មជ្ឈមណ្ឌលសន្តិសុខអ៊ីនធឺណិតអូស្ត្រាលី បានឲ្យដឹងនៅក្នុងរបាយការណ៍ក្នុងខែនេះថា កិច្ចព្រមព្រៀងការពារជាតិថ្មីជាមួយសហរដ្ឋអាមេរិក និងចក្រភពអង់គ្លេស បានធ្វើប្រទេសក្លាយជាគោលដៅធំជាងគេ៕