ទីភ្នាក់ងារព័ត៌មានផ្លូវការ WAFA របស់ប៉ាឡេស្ទីន បានរាយការណ៍ថា ជនប៉ាឡេស្ទីន ៧នាក់ ត្រូវបានសម្លាប់ និងមនុស្សជាច្រើននាក់ផ្សេងទៀត បានរងរបួសនៅថ្ងៃពុធនេះ នៅជំរំ Tulkarm នៅតំបន់កាន់កាប់វ៉េសប៊ែង អំឡុងការវាយប្រហារដោយយានដ្រូនអ៊ីស្រាអែល ។

ទីភ្នាក់ងារមួយនេះ រាយការណ៍ទៀតថា យោធាអ៊ីស្រាអែលបានបើកការវាយឆ្មក់លើផ្នែកសង្រ្គោះបន្ទាន់នៅមន្ទីរពេទ្យរដ្ឋ Thabet Thabet ស្ថិតក្នុងជំរំ Tulkarm ។

អ៊ីស្រាអែល បានបើកការវាយប្រហារលើក្រុមប្រដាប់អាវុធនៅតំបន់វ៉េសប៊ែង ស្របពេលដែលសង្រ្គាមរបស់ពួកគេ កំពុងឡើងកម្តៅខ្លាំង ជាមួយនឹងការវាយប្រហារលើគោលដៅរបស់ក្រុមហាម៉ាស់ និងអ៊ីស្លាមជីហាដនៅតំបន់ហ្គាហ្សាស្រ្ទីប គឺជាដែនដីមួយទៀតដែលជនប៉ាឡេស្ទីន ព្យាយាមបង្កើតរដ្ឋឯករាជ្យរបស់ពួកគេ ។

យោងតាមការអះអាងរបស់ក្រសួងសុខាភិបាលប៉ាឡេស្ទីន បានឲ្យដឹងថា ជនប៉ាឡេស្ទីនយ៉ាងហោច ២២៥នាក់ ត្រូវបានសម្លាប់ និងមនុស្ស ២.៨៥០នាក់ផ្សេងទៀត បានរងរបួស ដោយសារការវាយប្រហាររបស់កងកម្លាំងអ៊ីស្រាអែលនៅតំបន់វ៉េសប៊ែង ចាប់តាំងពីថ្ងៃទី ៧ ខែតុលារហូតមក ៕