ក្រោយពេលដែលកម្មកររបស់ខ្លួនជាង ១ពាន់នាក់ ចូលរួមធ្វើសង្រ្គាមប្រឆាំងការវាយលុករបស់រុស្ស៊ី អណ្តូងរ៉ែធ្យូងថ្មនៅតំបន់ភាគខាងកើតអ៊ុយក្រែន បានទទួលរងកង្វះខាតបុគ្គលិកយ៉ាងធ្ងន់ធ្ងរ ។ ពួកគេបានដោះស្រាយវិបត្តិមួយនេះ ដោយអនុញ្ញាតឲ្យស្រ្តីធ្វើការក្រោមដីជាលើកដំបូងនៅក្នុងប្រវត្តិសាស្រ្តរបស់ពួកគេ ។

អស់រយៈពេល ៥ខែមកហើយដែលនាង Krystyna វ័យ ២២ឆ្នាំ ធ្វើការជាអ្នកបច្ចេកទេស ក្នុងជម្រៅដី ៤៧០ម៉ែត្រ ដឹកកម្មករចម្ងាយជាង ៤គ.មពីជណ្តើរយន្ត ជាកន្លែងដែលពួកគេចុះយកធ្យូងថ្ម ។

នាង Krystyna បានទទួលយកការងារមួយនេះ ក្រោយជំនះការភ័យរបស់នាងក្នុងការទុកចោលកូនប្រុស Denys អាយុ ៤ឆ្នាំរបស់នាងនៅផ្ទះ ជាមួយម្តាយរបស់នាង ។ ទីក្រុងកំណើត Pavlohrad របស់នាងស្ថិតនៅចម្ងាយប្រហែល ១០០គ.មពីសមរភូមិមុខ ប៉ុន្តែវាតែងតែរងការវាយប្រហារដោយមីស៊ីលរុស្ស៊ី ។

នាងនិយាយថា ការងារគួរឲ្យចាប់អារម្មណ៍ តែពិបាកបន្តិច ។ គម្របអាគុយធ្ងន់ខ្លាំងណាស់ ហើយចំហាយធ្យូងថ្ម ពិបាកទ្រាំទៀតផង ។ ទោះបីជាយ៉ាងណាក៏ដោយ ថ្លៃកម្លាំងពលកម្មល្អ ។

នាង Krystyna បន្តថា បងប្រុសរបស់នាងធ្វើការនៅក្នុងអណ្តូងរ៉ែតែមួយ ។ គាត់បានចូលបម្រើកងទ័ពកាលពីរយៈពេល ២សប្តាហ៍មុន ក្រោយការចាប់ផ្តើមការវាយលុកទ្រង់ទ្រាយធំរបស់រុស្ស៊ីកាលពីឆ្នាំ ២០២២ តែនាងព្រួយបារម្ភពីសុវត្ថិភាពរបស់គាត់ខ្លាំងណាស់ ។

សូមបញ្ជាក់ថា ឧស្សាហកម្មធ្យូងថ្មអ៊ុយក្រែន ដែលធ្លាប់ជាឧស្សាហកម្មធ្យូងថ្មធំជាងគេបំផុតនៅអឺរ៉ុប បានធ្លាក់ចុះអស់រយៈពេលជាច្រើនទសវត្សរ៍មកហើយ ចាប់តាំងពីការដួលរលំទៅរបស់អតីតសហភាពសូវៀត ៕