មេដឹកនំាក្រុមឧទ្ទាមហេសប៊ូឡារបស់លីបង់លោក Sayyed Hassan Nasrallah បានជួបជាមួយក្រុមមេដឹកនាំកំពូលៗរបស់ក្រុមជីវពលហាម៉ាស់របស់ប៉ាឡេស្ទីន រួមទាំងលោក Khalil al-Hayya និងលោក Osama Hamdan នៅលើទីតាំងកំណត់មួយនៅក្នុងប្រទេសលីបង់ ។

 សេចក្តីថ្លែងការណ៍ចេញដោយក្រុមហេសប៊ូឡា បាននិយាយថា លោក Nasrallah បានជួបជាមួយក្រុមមេដឹកនាំហាម៉ាស់ ជាទីដែលពួកគេបានវាយតម្លៃលើដំណើរវិវត្តន៍ចុងក្រោយ និងលទ្ធភាពនៅខ្សែត្រៀមមុខទាំងអស់ ពិសេសនៅតំបន់ហ្គាហ្សាស្រ្ទីប ។

 សេចក្តីថ្លែងការណ៍បន្តទៀតថា ក្រុមមេដឹកនាំទាំងនេះ បានធានាដល់សារៈសំខាន់នៃការសម្របសម្រួលអចិន្រ្តៃយ៍ ដើម្បីសម្រេចបានជ័យជំនះ ។

នៅថ្ងៃពុធនេះដែរ រដ្ឋាភិបាលអ៊ីស្រាអែល និងក្រុមហាម៉ាស់ បានយល់ព្រមការផ្អាកសង្រ្គាមរយៈពេល ៤ថ្ងៃ ដើម្បីអនុញ្ញាតឲ្យដោះលែងចំណាប់ថ្នូរ ៥០នាក់នៅតំបន់ហ្គាហ្សា ជាការដោះដូរនឹងជនប៉ាឡេស្ទីន ១៥០នាក់ ដែលជាប់ពន្ធនាគារនៅអ៊ីស្រាអែល ហើយនិងការចូលជំនួយមនុស្សធម៌ទៅកាន់តំបន់ឡោមព័ទ្ធមួយនេះ ។

 បទឈប់បាញ់លើកដំបូងនៅក្នុងសង្រ្គាមដ៏ឃោឃៅរយៈពេលជិត ៧សប្តាហ៍ ដែលបានឈានដល់ ក្រោយកិច្ចចរចាសម្របសម្រួលដោយកាតានេះ ត្រូវបានគេកោតសរសើរនៅជុំវិញពិភពលោកថា ជាសញ្ញានៃដំណើរវិវត្តន៍ដែលអាចឈានទៅរកការបញ្ចប់ការរងគ្រោះរបស់ជនស៊ីវិលនៅតំបន់ហ្គាហ្សា ហើយនិងការនាំយកចំណាប់ថ្នូរអ៊ីស្រាអែល មកផ្ទះវិញទាំងអស់ ។

 អ៊ីស្រាអែល អះអាងថា បទឈប់បាញ់ អាចនឹងបន្តបន្ថែមទៀត ដរាបណាតែចំណាប់ថ្នូរបន្ថែមទៀត ត្រូវបានដោះលែង ៕