ប្រជាពលរដ្ឋរស់នៅទីក្រុង Rafah និយាយថា មនុស្សជាច្រើននាក់ ត្រូវបានសម្លាប់នៅក្នុងការវាយប្រហារតាមច្រកអាកាសរបស់អ៊ីស្រាអែលនាថ្ងៃពុធនេះ រយៈពេល ១ថ្ងៃមុនបទឈប់បាញ់តាមការរំពឹងទុករវាងអ៊ីស្រាអែល និងក្រុមហាម៉ាស់ ។ 

យោងតាមការអះអាងរបស់ក្រុមសាក្សី បានឲ្យដឹងថា ការវាយប្រហារតាមច្រកអាកាសមានគោលដៅលើអគារគ្រួសារ Owayda ស្ថិតនៅទីក្រុងភាគខាងកើត Rafah ជាហេតុនាំឲ្យមានការសង្ស័យលើប្រសិទ្ធិភាពនៃបទឈប់បាញ់ស្នើសុំ ។ 

លោក Mohammed Abu Halaleh គឺជាសាក្សីមួយរូប និយាយថា តើបទឈប់បាញ់អ្វីដែលអ្នកកំពុងនិយាយ ពេលដែលមានការសម្លាប់រង្គាលកើតឡើងបែបនេះ? តើនេះគឺជាបទឈប់បាញ់ឬ? ទាំងនេះគឺជាការសម្លាប់រង្គាល។ មុនបទឈប់បាញ់ និងក្រោយបទឈប់បាញ់ អ៊ីស្រាអែលប្រព្រឹត្តអំពើប្រល័យពូជសាសន៍ ។ 

សូមបញ្ជាក់ថា នៅថ្ងៃពុធនេះដែរ រដ្ឋាភិបាលអ៊ីស្រាអែល និងក្រុមហាម៉ាស់ បានយល់ព្រមការផ្អាកសង្រ្គាមរយៈពេល ៤ថ្ងៃ ដើម្បីអនុញ្ញាតឲ្យដោះលែងចំណាប់ថ្នូរ ៥០នាក់នៅតំបន់ហ្គាហ្សា ជាការដោះដូរនឹងជនប៉ាឡេស្ទីន ១៥០នាក់ ដែលជាប់ពន្ធនាគារនៅអ៊ីស្រាអែល ហើយនិងការចូលជំនួយមនុស្សធម៌ទៅកាន់តំបន់ឡោមព័ទ្ធមួយនេះ ៕