ដៃគូសម្ព័ន្ធយុវជននៃគណបក្សប្រជាធិបតេយ្យសេរី (LDP) ដែលកំពុងកាន់អំណាចរបស់ប្រទេសជប៉ុន បានបញ្ជូនគណៈប្រតិភូមួយក្រុមទៅកាន់ទីក្រុងប៉េកាំង ក្នុងគោលបំណងធ្វើឲ្យទំនាក់ទំនងប្រសើរឡើង ពោលគឹជាដំណើរទស្សនកិច្ច ដែលត្រូវបានធ្វើឡើង បន្ទាប់ពីពន្យារពេលកាលពីរដូវក្តៅ ចំពេលមានភាពតានតឹង រវាងប្រទេស ដែលមានសេដ្ឋកិច្ចធំបំផុតទាំង២ នៅតំបន់អាស៊ី។

គណៈប្រតិភូរបស់គណបក្ស Komeito ដឹកនាំដោយលោក Natsuo Yamaguchi នៅថ្ងៃពុធ (ទី២២ ខែវិច្ឆិកា) នេះ បានជួបជាមួយលោក Cai Qi ប្រធានលេខាធិការដ្ឋានដ៏មានឥទ្ធិពលនៃគណៈកម្មាធិការមជ្ឈិមបក្សកុម្មុយនីស្តចិន (CPC) ដែលគ្រប់គ្រងកិច្ចការប្រចាំថ្ងៃរបស់ CPC ។

ប្រព័ន្ធផ្សព្វផ្សាយរដ្ឋចិន បានដកស្រង់សម្តីរបស់លោក Cai ដែលបានប្រាប់គណៈប្រតិភូជប៉ុនថា គណបក្សកាន់អំណាចនៃប្រទេសទាំង២ គួរតែ «ទទួលយកការអភិវឌ្ឍ និងគោលដៅយុទ្ធសាស្ត្ររបស់គ្នាទៅវិញទៅមកដោយត្រឹមត្រូវ»។ ហើយលោក Cai បានបន្ថែមថា ភាគីទាំង២ គួរតែធ្វើការរួមគ្នា ដើម្បីលើកកម្ពស់ការយល់ពីគ្នាទៅវិញទៅមកប្រកបដោយភាព «វិជ្ជមាន» និង «មិត្តភាព»។

ដំណើរទស្សនកិច្ចនេះបានកើតឡើងភា្លមៗបន្ទាប់ពីមានជំនួបទល់មុខដ៏កម្រ រវាងប្រធានាធិបតីចិនលោក Xi Jinping និងលោកនាយករដ្ឋមន្ត្រីជប៉ុន Fumio Kishida ដែលជាមេដឹកនាំរបស់គណបក្ស LDP នៅក្រៅកិច្ចប្រជុំកំពូលកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) នៅសហរដ្ឋអាមេរិក កាលពីសប្តាហ៍មុន ជាពេលដែលភាគីទាំង២ បានបញ្ជាក់ពីទំនាក់ទំនងយុទ្ធសាស្ត្រ។

សូមបញ្ជាក់ថា ទំនាក់ទំនងទ្វេភាគីបានស្ថិតក្នុងភាពតានតឹង បន្ទាប់ពីប្រទេសជិតខាងអាស៊ីទាំង២ បានប៉ះទង្គិចគ្នា ជុំវិញបញ្ហានៃការបញ្ចេញទឹកវិទ្យុសកម្មរបស់ជប៉ុនចូលទៅក្នុងមហាសមុទ្រ៕