រដ្ឋបាលរាជធានីភ្នំពេញ បានប្រារព្ធពិធីបួងសួងសុំសេចក្តីសុខក្នុងព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក។

មុនព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក មកដល់នាចុងសប្ដាហ៍នេះ រដ្ឋបាល​រាជធានីភ្នំពេញ​ បាន​រៀបចំ​ពិធី​បួង​សួង​សុំ​សេចក្តី​សុខ​តាម​បែប​សាសនា​នៅ​រមណីយដ្ឋាន​ប្រវត្តិ​សាស្រ្ត​វត្តភ្នំ នាព្រឹកថ្ងៃទី២៣ ខែវិច្ជិកា ឆ្នាំ២០២៣។

ក្នុងពិធីបួងសួងសុំសេចក្តីសុខនេះដែរ ឯកឧត្តម ឃួង ស្រេង អភិបាលរាជធានី​បាន​ផ្ដាំផ្ញើ​ទៅ​ដល់​កីឡាករ​កីឡាការិនី​អុំទូក​ទាំងអស់​នៅ​ក្នុង​អំឡុង នៃ​ការ​ប្រកួត​អុំទូក​នៅ​ក្នុង​ព្រះរាជ​ពិធី​អុំទូក​ខាង​មុខ​នេះ ហាមដាច់ខាតមិនឲ្យមានអំពើហិង្សាកើតឡើងផ្តើមចេញពីពាក្យសំដី «ទូកចាញ់ នៅ​មនុស្ស​» កិច្ចការនេះក៏បានឱ្យអាជ្ញាធរ និងមន្ត្រីពាក់ព័ន្ធក៏ដូចជាអ្នកគ្រប់គ្រងកីឡាករ កីឡាការិនី ធ្វើ​ការណែនាំបន្ត និងសូមរក្សាកម្លាំងដើម្បីប្រកួតយកជ័យជំនះ ហើយ​អ្នក​គ្រប់​គ្រង​ចំណុះ​ទូក​ទាំង​អស់​ក៏​ត្រូវ​តែមើលថែកីឡាករ។

ឯកឧត្តម ឃួង ស្រេង បានបន្ថែមថា ព្រះរាជពិធីបុណ្យអុំទូក ធ្វើឡើងដើម្បី​រំលឹក​ទៅ​ដល់​គុណ​បុព្វ​បុរសខ្មែរ​ពី​ជំនាន់ដើម ពិសេសរំលឹកទៅដល់កងទ័ពជើងទឹក ដែល​បាន​ការ​ពារ​មហា​នគរ​បាន​រឹង​មាំ​នា​សម័​យនោះ ហើយព្រះរាជពិធីបុណ្យអុំទូក ដែលនឹងប្រព្រឹត្តទៅនាឆ្នាំនេះ គឺជាឆ្នាំទី១ នៃ​អាណត្តិ​ទី៧ ក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត ក្រោយ​ប្រទេស​កម្ពុជា​ទទួល​ជោគ​ជ័យយ៉ាងធំធេងលើការគ្រប់គ្រងជំងឺកូវីដ-១៩។ អនុវត្តតាម អនុសាសន៍​ណែនាំ​របស់​សម្ដេច​មហា​បវរធិបតី ហ៊ុន ម៉ាណែត គណៈបញ្ជាការឯកភាពរាជធានីភ្នំពេញ បានត្រៀម​រួច​រាល់​ហើយ​ក្នុង​ការរក្សាសន្តិសុខ សុវត្ថិភាពជូនប្រជាពលរដ្ឋ ដែលមក​លេង​កម្សា​ន្ដ​ព្រះរាជ​ពិធី​បុណ្យ​អុំទូក​នៅ​ឆ្នាំនេះ ពោលគឺធ្វើយ៉ាងណាឱ្យព្រះរាជពិធីបុណ្យអុំទូកនេះ ទទួល​បាន​នូវ​ភាព​រលូន និង​ជោគជ័យ។

សូមជម្រាបជូនថា ក្រៅពីការសំណេះសំណាលជាមួយកីឡាករ កីឡាការិនីអុំទូក ឯកឧត្តម ឃួង ស្រេង ក៏បាននាំនូវអំណោយរបស់សម្ដេចមហាបវរធិបតី ហ៊ុន ម៉ាណែត ជូនកីឡាករ កីឡាការិនីចំណុះទូកចំនួន ៤៤ទូករបស់រដ្ឋបាលរាជធានីភ្នំពេញផងដែរ៕ អត្ថបទ ៖ ប្រាក់ វ៉ាន់ដា