រដ្ឋាភិបាលចម្រុះរបស់លោកអធិការបតីអាល្លឺម៉ង់ អូឡាហ្វ សូល (Olaf Scholz) កាលពីថ្ងៃពុធ បានពន្យារពេលការពិភាក្សាអំពីថវិកាឆ្នាំក្រោយ ដោយគ្មានកំណត់ពេល ខណៈដែលខ្លួនព្យាយាមស្វែងរកផ្លូវចេញពីវិបត្តិដែលបណ្តាលមកពីសេចក្តីសម្រេចរបស់តុលាការ ដែលបានធ្វើឲ្យជាប់បំណុលហិរញ្ញវត្ថុចំនួន៦០ពាន់លានអឺរ៉ូ (៦៥ពាន់លានដុល្លារ)។

ការពន្យារពេលនៃកិច្ចពិភាក្សា ដែលត្រូវបានគ្រោងទុកក្នុងសភាសម្រាប់ថ្ងៃព្រហស្បតិ៍នេះ បានគូសបញ្ជាក់ពីបញ្ហាដែលរដ្ឋាភិបាលកំពុងប្រឈម បន្ទាប់ពីតុលាការធម្មនុញ្ញ បានរារាំងការផ្ទេរមូលនិធិសម្រាប់ជំងឺរាតត្បាត ដែលមិនប្រើប្រាស់ ចូលទៅការវិនិយោគបៃតង និងការគាំទ្រដល់ផ្នែកឧស្សាហកម្ម។

ការពន្យារពេលនេះ បានជំរុញឲ្យមានការព្រមានថា កំណើនសេដ្ឋកិច្ចដែលកំពុងធ្លាក់ចុះរួចទៅហើយរបស់ប្រទេសអាល្លឺម៉ង់ អាចនឹងត្រូវអូសបន្លាយដល់ឆ្នាំក្រោយ ហើយគម្រោង និងការឧបត្ថម្ភធន ដើម្បីរក្សាការប្រកួតប្រជែង ក្នុងឧស្សាហកម្មរបស់ខ្លួនឥឡូវនេះ កំពុងស្ថិតក្នុងហានិភ័យ។

គណបក្សទាំងបីនៅក្នុងរដ្ឋាភិបាលចម្រុះរបស់លោក អូឡាហ្វ សូល ជាមួយនឹងគណបក្ស Greens និងគណបក្សប្រជាធិបតេយ្យសេរីនិយម (FDP) កំពុងព្យាយាមធ្វើឲ្យមានដំណោះស្រាយ ដើម្បីរក្សាការសន្យាចំណាយចំនួនច្រើនតាមដែលអាចធ្វើទៅបាន និងធ្វើឲ្យពួកវាអនុលោមតាមច្បាប់។