យ៉ាងហោចណាស់មានជនជាតិថៃចំនួន ៣០ នាក់ នៅតែត្រូវបានគេជឿថាកំពុងជាប់ខ្លួននៅក្នុងទីក្រុង ឡកកៃ (Laukkai) ក្នុងរដ្ឋ សាន (Shan) ភាគឦសាននៃសហភាពមីយ៉ាន់ម៉ា។

ជនជាតិផ្សេងទៀតដូចជា ម៉ាឡេស៊ី និងហ្វីលីពីន ក៏ត្រូវបានគេនិយាយថា ស្ថិតក្នុងចំណោមអ្នកដែលនៅតែជាប់នៅក្នុងទីក្រុង ឡកកៃ នោះផងដែរ។ ជនបរទេសទាំងនេះ កំពុងប្រឈមមុខនឹងកង្វះខាតស្បៀងអាហារ និងទឹកកាន់តែខ្លាំងឡើង។

មានការរាយការណ៍ថា ជនជាតិថៃមួយចំនួនត្រូវបានគេសន្យាថានឹងផ្តល់ឱកាសការងារដ៏គួរឱ្យទាក់ទាញជាមួយបណ្ដាក្រុមហ៊ុនអន្តរជាតិនៅក្នុងប្រទេសមីយ៉ាន់ម៉ា ប៉ុន្តែបែរជាត្រូវបានបោកបញ្ឆោតឱ្យធ្វើការជាអ្នកបោកប្រាស់នៅមជ្ឈមណ្ឌលហៅទូរស័ព្ទនៅទីនោះទៅវិញ។

កាលពីដើមសប្តាហ៍នេះ បុរសជាឪពុកជនជាតិថៃម្នាក់ មានការធូរស្បើយក្នុងចិត្ត នៅពេលដែលលោកបានដឹងថាកូនប្រុសរបស់ខ្លួនត្រូវបានគេជម្លៀសទៅកាន់ទីក្រុងបាងកក តាមរយៈប្រទេសចិន កាលពីព្រឹកថ្ងៃច័ន្ទ (២០ វិច្ឆិកា) ។

ការជម្លៀសនេះកើតឡើងនៅពេលដែលការប៉ះទង្គិចគ្នានៅទូទាំងសហភាពមីយ៉ាន់ម៉ា នៅតែបន្ត ដោយក្រុមប្រឆាំងរដ្ឋប្រហារជាច្រើនកំពុងប្រយុទ្ធជាមួយយោធាដើម្បីដណ្ដើមគ្រប់គ្រងប្រទេស។

ក្រុមប្រដាប់អាវុធជនជាតិភាគតិច ត្រូវបានគេរាយការណ៍ថាបានកាន់កាប់មូលដ្ឋានជាង ១៥០ទីតាំង និងកន្លែងឈរជើងរបស់យោធាមីយ៉ាន់ម៉ាជាច្រើននៅក្នុងតំបន់ព្រំដែន។ ទីក្រុង ឡកកៃ បានមើលឃើញការប្រយុទ្ធគ្នាយ៉ាងខ្លាំងក្លារវាងក្រុមប្រដាប់អាវុធជនជាតិភាគតិច និងយោធាមីយ៉ាន់ម៉ា ដែលបានដណ្តើមអំណាចនៅក្នុងរដ្ឋប្រហារឆ្នាំ២០២១ មក៕