នាយករដ្ឋមន្ត្រីកាណាដា លោក Justin Trudeau បានបញ្ជាក់ នៅថ្ងៃពុធ (ទី២២ ខែវិច្ឆិកា) ថា អាជ្ញាធរកំពុងស៊ើបអង្កេត ជុំវិញការផ្ទុះរថយន្ត នៅឯច្រកឆ្លងកាត់ដ៏សំខាន់មួយ រវាងសហរដ្ឋអាមេរិក និងកាណាដា។

ដោយដកស្រង់ប្រភពនានា ដែលមិនបញ្ចេញឈ្មោះ ប្រព័ន្ធផ្សព្វផ្សាយ Fox News បានរាយការណ៍នៅមុននេះថា ការិយាល័យស៊ើបអង្កេតសហព័ន្ធ ឬFBI កំពុងស៊ើបអង្កេតការផ្ទុះរថយន្ត នៅច្រកព្រំដែន Rainbow Bridge (ស្ពានឥន្ទធនូ) ថា ជាការប៉ុនប៉ង «វាយប្រហារភេរវកម្ម»។ សេចក្ដីរាយការណ៍បានឲ្យដឹងថា មនុស្ស ២នាក់ នៅក្នុងរថយន្ត បានស្លាប់ ហើយមន្ត្រីល្បាតព្រំដែនម្នាក់ បានរងរបួស។

ក្រោយកើតហេតុការណ៍នេះ ដោយចាត់ទុកស្ថានការណ៍នេះថា មិនធម្មតានោះ លោក Trudeau បាននិយាយថា ច្រកព្រំដែនអន្តរជាតិទាំង៤ នៅភាគខាងលិចក្រុងញ៉ូវយករបស់សហរដ្ឋអាមេរិក ត្រូវបានបិទ។ តែយ៉ាងណាក្ដី ប្រព័ន្ធផ្សព្វផ្សាយ NBC News បានរាយការណ៍ថា អាជ្ញាធរមិនបានរកឃើញជាតិផ្ទុះនៅក្នុងរថយន្តនោះទេ ដោយសំអាងលើប្រភពអនុវត្តច្បាប់ ដែលនិយាយ ក្នុងលក្ខខណ្ឌមិនបញ្ចេញឈ្មោះ៕