គណបក្សជាតិ (National Party) របស់ប្រទេសនូវ៉ែលសេឡង់ បានឈានដល់កិច្ចព្រមព្រៀងជាមួយគណបក្ស ACT New Zealand និង New Zealand First ដើម្បីបង្កើតរដ្ឋាភិបាល ហើយការចុះហត្ថលេខាបញ្ចប់ចុងក្រោយ អាចត្រូវបានធ្វើ នាពេលយប់ថ្ងៃព្រហស្បតិ៍ (ទី២៣ ខែវិច្ចិកា) នេះ។

គណបក្សជាតិអភិរក្សនិយម ទទួលបានសំឡេងឆ្នោតច្រើនជាងគេ នៅក្នុងការបោះឆ្នោតសកល កាលពីថ្ងៃទី១៤ ខែតុលារបស់ប្រទេសនូវ៉ែលហ្សេឡង់ ប៉ុន្តែត្រូវការការគាំទ្រពីគណបក្សស្តាំនិយម ACT New Zealand និងគណបក្សប្រជានិយម New Zealand First ដើម្បីអាចបង្កើតរដ្ឋាភិបាលសំឡេងភាគច្រើនបាន។

សេចក្តីថ្លែងការណ៍រួមរបស់នាយករដ្ឋមន្រ្តីបន្ទាប់ លោក Christopher Luxon លោក David Seymour របស់គណបក្ស ACT និងលោក Winston Peters របស់គណបក្ស New Zealand First បានឲ្យដឹងថា៖ «ដោយអាស្រ័យលើការព្រមព្រៀងពីភាគីទាំងអស់ ពិធីចុះហត្ថលេខានឹងប្រព្រឹត្តទៅនៅថ្ងៃស្អែក នៅរដ្ឋសភា»។

យ៉ាងណាក្ដី សេចក្តីថ្លែងការណ៍នេះមិនរួមបញ្ចូលព័ត៌មានលម្អិតនៃការតែងតាំងរដ្ឋមន្ត្រីណាម្នាក់ ឬអាទិភាពគោលនយោបាយរបស់រដ្ឋាភិបាលថ្មីនោះទេ៕