កងទ័ពអ៊ីស្រាអែល បានបង្ហាញផ្លូវរូងក្រោមដីនៅក្រោមមន្ទីរពេទ្យ Al Shifa ស្ថិតក្នុងតំបន់ហ្គាហ្សាស្រ្ទីបដល់ទីភ្នាក់ងារព័ត៌មានរ៉យទ័រ គឺជាផ្លូវរូងក្រោមដីមានបន្ទប់ទឹក ផ្ទះបាយ និងបន្ទប់ប្រជុំមានបំពាក់ម៉ាស៊ីនត្រជាក់ដែលបម្រើជាប៉ុស្តិ៍បញ្ជាការសម្រាប់ក្រុមសកម្មប្រយុទ្ធហាម៉ាស់ ។

 ផ្លូវរូងក្រោមដែលផ្លូវខ្លះមានកម្ពស់ ២ម៉ែត្រនេះ អាចចូលដល់ពីបរិវេនមន្ទីរពេទ្យ ដែលធ្លាប់មានជនប៉ាឡេស្ទីនរាប់ម៉ឺននាក់ ស្វែងរកទីជម្រក ហើយត្រូវបានប្រើប្រាស់ដោយក្រុមជីវពលហាម៉ាស់ជាខែលមនុស្សគេចចេញពីសង្រ្គាម ។

 លោកវរសេនីយ៍ឯក Elad Tsuri គឺជាមេបញ្ជាការកងពលតូចរថពាសដែកអ៊ីស្រាអែលដែលបានស្វែងរកឃើញផ្លូវរូងក្រោមដីនេះ និយាយថា នោះគឺជាផ្លូវដែលពួកគេរស់រាន ដោយសារតែពួកគេប្រើប្រាស់មន្ទីរពេទ្យជាខែលមនុស្សដើម្បីការពារពួកគេ ហើយនៅទីនេះ ពួកគេអាចស្នាក់នៅបានយូរ ពីព្រោះថាមានបន្ទប់បំពាក់ម៉ាស៊ីនត្រជាក់នៅក្នុងនោះ ។

 គួរឲ្យដឹងថា អ៊ីស្រាអែលបានចោទប្រកាន់ជាយូរមកហើយថា ក្រុមហាម៉ាស់ ប្រើប្រាស់មន្ទីរពេទ្យ Al Shifa ជាមន្ទីរគ្រប់គ្រង និងទីបញ្ជាការរបស់ពួកគេ ដែលជាផ្នែកមួយនៃយុទ្ធសាស្រ្តទូលំទូលាយរបស់ពួកគេដើម្បីលាក់ខ្លួនកងកម្លំាងរបស់ពួកគេនៅក្នុងចំណោមជនស៊ីវិល ។

 ទោះបីជាយ៉ាងណាក៏ដោយ ក្រុមហាម៉ាស់ និងក្រុមមន្រ្តីមន្ទីរពេទ្យ បានច្រានចោលការចោទប្រកាន់បែបនេះ ហើយមន្ទីរពេទ្យ ស្ថិតនៅកណ្តាលការចោទប្រកាន់ពីឧក្រិដ្ឋកម្មសង្រ្គាមលើភាគីទាំង ២ ក្នុងនោះប៉ាឡេស្ទីន ចោទប្រកាន់អ៊ីស្រាអែលថាមានគោលដៅលើមន្ទីរពេទ្យ ហើយអ៊ីស្រាអែលចោទប្រកាន់ថា ទីតាំងមួយនេះ ត្រូវបានប្រើជាកន្លែងផ្តល់ជម្រកលាក់ខ្លួនដល់ក្រុមប្រដាប់អាវុធហាម៉ាស់ ។

 ក្រុមអ្នកសារព័ត៌មាន ត្រូវបានដឹកតាមរថយន្តយោធាអ៊ីស្រាអែលទៅកាន់បរិវេនមន្ទីរពេទ្យនៅតំបន់ភាគខាងជើងហ្គាហ្សា ឆ្លងកាត់អគាររងការបំផ្លិចបំផ្លាញ អំឡុងការវាយប្រហាររយៈពេលជិត ៧សប្តាហ៍របស់អ៊ីស្រាអែលលើតំបន់បិទច្រកប៉ាឡេស្ទីនមួយនេះ ៕