ភ្នំពេញ ៖កម្ពុជាមានមោទនភាពដែលមានដេប៉ាតឺម៉ង់វិស្វកម្ម ឧបករណ៍សិប្បនិម្មិត និងរណបមួយ បានក្លាយជាស្ថាប័នឈានមុខគេក្នុងពិភពលោក ដែលមាននិស្សិតមកពី ២៨ ប្រទេសមកសិក្សា ផ្តល់ជាគំរូក្នុងការបង្កើតសាលា ៤ ប្រទេសដទៃទៀត ថែមទាំងក្លាយជាអ្នកដឹកនាំសម្ព័ន្ធ នៃសាលាបណ្តុះបណ្តាលសិប្បនិមិត្ត និងរណប នៅអាស៊ី ។

​លោកស្រី ខេង ស៊ីសារី នាយិកាប្រចាំប្រទេស នៃអង្គការ Exceed Worldwide និងជានាយិកា DPO នាឱកាសប្រារព្ធខួបទី៣០ ឆ្នាំ របស់ដេប៉ាតឺម៉ង់វិស្វកម្មឧបករណ៍សិប្បនិម្មិត និងរណប កាលពីយប់ថ្ងៃទី២២ ខែវិច្ឆិកា ឆ្នាំ ២០២៣ ថា សម្រាប់កម្ពុជា ថ្នាលបង្រៀននិងផលិតឧបករណ៍សិប្បនិម្មិត និងរណប អតីតជាសាលាបច្ចេកទេសអវៈយវៈសប្បនិម្មិត និងរណបកម្ពុជានេះមានអាយុកាល ៣០ ហើយ ដែលបង្កើតឡើងក្នុងខែវិច្ឆិកា ឆ្នាំ ១៩៩៣ មកដើម្បីបណ្តុះបណ្តាលអ្នកជំនាញផ្នែកឧបករណ៍សិប្បនិមិត្ត និងរណប ១៥០ នាក់ ដើម្បីបំពេញតម្រូវការនៅកម្ពុជា ហើយ ត្រូវបានទទួលស្គាល់ជាអន្តរជាតិ ពីសមាគមអន្តរជាតិ នៃផ្នែកជំនាញឧបករណ៍សិប្បនិមិត្ត និងរណប នៅឆ្នាំ១៩៩៨។ 

លោកស្រីបន្តថាសាលានេះបានផ្តល់នូវការបណ្តុះបណ្តាលដែលមានការទទួលស្គាល់ជាអន្តរជាតិ ដល់សិស្សនិស្សិត ដែលមកពីប្រទេសផ្សេងៗ ដែលដំបូងនៅក្នុងតំបន់ ហើយក្រោយមក ក៏មានបណ្តាប្រទេសផ្សេងៗជាច្រើនទៀត ហើយនិស្សិតបរទេសដំបូងគេ មកពីប្រទេសឡាវ នៅឆ្នាំ១៩៩៨ ហើយឥឡូវនេះមាននិស្សិត ៣៥៤ នាក់មកពី ២៨ ប្រទេស ។  

ក្នុងឱកាសនោះដែរឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា បានមាន ប្រសាសន៍ថា ជាមោទនភាព១ ដែលការបណ្តុះបណ្តាលបច្ចេកទេស ផលិតឧបករណ៍ អវយវៈសិប្បនិម្មិត និងរណប និងការស្តារលទ្ធភាពពលកម្ម កាយសម្បទានេះ បានឆ្លើយ តបយ៉ាងប្រសើរទៅនឹងកម្មវិធីនយោបាយរបស់រាជរដ្ឋាភិ បាលកម្ពុជា ។

សូមជម្រាបជូនថា សាលា CSPO នេះត្រូវបានដាក់ឱ្យនៅក្រោមរចនាសម្ពន្ធរបស់វិទ្យាស្ថានជាតិសង្គមកិច្ច កាលពីថ្ងៃទី១៨ ខែតុលា ឆ្នាំ២០១១ និងបានប្រែក្លាយជាដេប៉ាតឺម៉ងវិស្វកម្មឧបករណ៍អវយវយៈសិប្បនិម្មិត និងរណប រហូតមកដល់បច្ចុប្បន្ន ។ ដេប៉ាតឺម៉ង់នេះ មានកម្មវិធីបង្រៀនកម្រិតបរិញ្ញបត្រ លើជំនាញអ្នកបច្ចេកទេសឧប ករណ៍អវយវយៈសិប្បនិម្មិត និងរណប និងកម្រិតវិញ្ញបនបត្រ លើជំនាញជំនួយការអ្នកបច្ចេកទេសផលិតអវយវយៈសិប្បនិម្មិត និងរណប ៕ អត្ថបទ ៖ ភារម្យ