ភ្នំពេញ៖ នៅព្រឹកថ្ងៃទី២៣ ខែវិច្ឆិកា ឆ្នាំ២០២៣ នៅវិមានរដ្ឋសភា ឯកឧត្តម ជា វ៉ាន់ដេត រដ្ឋមន្ត្រី​ក្រសួងប្រៃសណីយ៍ និង​ទូរគមនាគមន៍ បានអញ្ជើញដឹកនាំគណ:ប្រតិភូក្រសួង​ ចូលជួបប្រជុំ​ និង​រាយ​ការណ៍​ការងារជូន លោកជំទាវ និន សាផុន ប្រធានគណៈកម្មការសាធារណការ ដឹកជញ្ជូន ប្រៃសណីយ៍ ទូរគមនាគមន៍ ឧស្សាហកម្ម រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និង​សំណង់ នៃរដ្ឋសភា (គណៈកម្មការទី៩) និងឯកឧត្តម លោកជំទាវ ជាសមាជិក សមាជិកា នៃ​គណៈកម្មការទាំង១០​ នៃរដ្ឋសភា។ ជំនួប​នេះ​ រៀប​ចំឡើង​ក្នុង​គោល​បំណង​ដើម្បី​ឈ្វេង​យល់​ និង​ពិភាក្សាអំពីការវិវឌ្ឍ បញ្ហា​ប្រឈម​ជា​ទូទៅ​របស់​ក្រសួង​ប្រៃសណីយ៍ និង​ទូរ​គមនាគមន៍​នៅ​ក្នុង​រយៈ​ពេលប៉ុន្មានឆ្នាំចុងក្រោយនេះ និងទិសដៅការងារទៅថ្ងៃអនាគត។

នៅ​ក្នុងឱកាសនោះ ឯកឧត្តមរដ្ឋមន្ត្រី ជា វ៉ាន់ដេត បាន​ជម្រាប​ជូន​អង្គ​ប្រជុំ​អំពី​វឌ្ឍនភាព​ការងារ​របស់​ក្រសួង ក្នុងការកំណែទម្រង់ផ្ទៃក្នុងក្រសួង ការរៀបចំគោលនយោបាយ ច្បាប់ និង​បទ​ប្បញ្ញត្តិ​ពាក់​ព័ន្ធ​នឹងវិស័យរបស់ក្រសួង ការអភិវឌ្ឍវិស័យប្រៃសណីយ៍ ទូរគមនាគមន៍ និង​បច្ចេក​វិទ្យា​គមនាគមន៍ និង​ព័ត៌មាន ការរៀបចំហេដ្ឋារចនាសម្ព័ន្ធតភ្ជាប់ឌីជីថល ការលើក​កម្ពស់​គុណ​ភាព​សេវា​​ទូរសព្ទ​ចល័ត តាមរយៈការសាងសង់ស្ថានីយអង់តែន ការធ្វើឱ្យសេវា​ទូរ​គមនាគមន៍​កាន់​តែ​ប្រសើរ​ឡើង ដើម្បីឆ្លើយតបទៅនឹងកំណើននៃតម្រូវការប្រើប្រាស់។ ជាមួយគ្នានេះ ឯកឧត្តម​រដ្ឋ​មន្ត្រី បានជម្រាបជូនបន្ថែមអំពី ការកសាងរដ្ឋាភិបាលឌីជីថល ស្រប​តាម​យុទ្ធសាស្រ្ត​បញ្ចកោណ​ដំណាក់​កាល​ទី១ របស់រាជរដ្ឋាភិបាល ក្រោមការដឹកនាំ​ប្រកប​ដោយ​គតិ​បណ្ឌិត​របស់​សម្តេច​​ធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា។ ទន្ទឹមនឹងនេះ​ ក៏បានជម្រាប​ជូន​ពី​ការ​ធ្វើ​បរិវត្ត​កម្ម​ឌីជីថល ក្នុងក្រសួង-ស្ថាប័ន ការបង្កើតអង្គភាពបរិវត្តកម្មឌីជីថល ការ​រៀបចំ​តភ្ជាប់​បណ្តាញ​រាជ​រដ្ឋាភិបាល និងថ្នាក់ក្រោមជាតិ ឧបករណ៍និងប្រព័ន្ធ ការរៀបចំមជ្ឈមណ្ឌលទិន្នន័យ ការ​រៀបចំផែនការអភិវឌ្ឍឌីជីថលក្នុងក្រសួងនីមួយៗ និងការរៀបចំផែនការសកម្មភាពជាដើម។ បន្ថែម​លើនេះ ឯកឧត្តមរដ្ឋមន្ត្រី បានបន្ថែមអំពីការកសាងពលរដ្ឋឌីជីថល ក្នុងការ​អភិវឌ្ឍ​ធន​ធាន​មនុស្ស​តាម​រយៈកម្មវិធីអាហារូបករណ៍ ការៀបចំមជ្ឈមណ្ឌលបច្ចេកវិទ្យាសហគមន៍ កម្មវិធី​អភិវឌ្ឍន៍​ជំនាញ​ឌីជីថល ការជំរុញការចាប់យកឌីជីថល ការបង្កើតកម្មវិធី​ប្រកួត​ប្រជែង​ពាក់​ព័ន្ធ​នឹង​ជំនាញ​ឌីជីថល ការបង្កើតថ្នាលឌីជីថលនានា ក្នុងគោលដៅ ពលរដ្ឋកម្ពុជា នឹង​ប្រែក្លាយ​ទៅ​ជា​ពលរដ្ឋ​ឌីជីថល ក្នុងរយៈពេល ១០-១៥ឆ្នាំខាងមុខ តាមរយៈ​ការ​បញ្ជ្រាប​បច្ចេក​វិទ្យា​ឌីជីថល​នៅ​ក្នុង​សង្គម​កម្ពុជា។

ក្រោយពីឯកឧត្តមរដ្ឋមន្ត្រី បានជម្រាបជូនគណៈកម្មការរួចហើយ លោកជំទាវ​ប្រធាន​គណៈ​កម្មការ បានថ្លែងការកោតសរសើរចំពោះរបាយការណ៍ដ៏ល្អិតល្អន់ និង​ការ​ឆ្លើយ​បំភ្លឺ​យ៉ាង​ក្បោះក្បាយ​របស់ឯកឧត្តមរដ្ឋមន្ត្រី ព្រមទាំងអបអរសាទរ និងវាយតម្លៃ​ខ្ពស់​ចំពោះ​សមិទ្ធ​ផល​ជា​ច្រើន​ដែល​ក្រសួង​ប្រៃសណីយ៍និងទូរគមនាគមន៍សម្រេចបាន។ ជាពិសេសគឺ លោកជំទាវ ចាប់​អារម្មណ៍​ខ្លាំង​លើការធ្វើកំណែទម្រង់របស់ក្រសួងប្រៃសណីយ៍ និងទូរគមនាគមន៍ ដែលផ្តោត​សំខាន់​លើ​ការ​អភិវឌ្ឍធនធានមនុស្សតាមរយៈការបង្កើតកម្មវិធីអភិវឌ្ឍន៍ជំនាញឌីជីថល។ លោកជំទាវប្រធានគណៈកម្មការទី៩ នៃរដ្ឋសភា បានថ្លែងថា សមិទ្ធផល​ទាំង​ឡាយ​ដែល​បាន​លើក​ឡើង គឺពិតជាបានបង្ហាញឱ្យឃើញថា ក្រសួងប្រៃសណីយ៍និងទូរគមនាគមន៍ បាន​និង​កំពុង​អនុវត្ត​ស្រប​តាម​យុទ្ធសាស្រ្តបញ្ចកោណដំណាក់កាលទី១ របស់រាជរដ្ឋាភិបាល។ លោក​ជំទាវ​នឹង​នាំ​យក​នូវ​ស្នាដៃដ៏ត្រចះត្រចង់របស់ក្រសួងប្រៃសណីយ៍និងទូរគមនាគមន៍ទាំងនេះ ទៅជម្រាប​ជូន​ថ្នាក់​ដឹក​នាំរដ្ឋសភាបានជ្រាបផងដែរ៕