ភ្នំពេញ ៖ បន្ទាប់ពីដំណើរការ កិច្ចប្រជុំរយៈពេល១ថ្ងៃ នៅរសៀលថ្ងៃទី ២៣ ខែវិច្ឆិកា ឆ្នាំ២០២៣នេះ ឯកឧត្តម ពិត ចំណាន សមាជិកគណៈកម្មាធិការកណ្តាល កាកបាទក្រហមកម្ពុជា និងជាអនុប្រធានអចិន្ត្រៃយ៍ក្រុមការងារទ្រទ្រង់សកម្មភាពយុវជន និងអ្នកស្ម័គ្រចិត្តកាកបាទក្រហមកម្ពុជា បានអញ្ជើញជាអធិបតីភាពក្នុងពិធីបិទ «កិច្ចប្រជុំបូកសរុបវឌ្ឍនភាពការងារអភិវឌ្ឍយុវជន និងអ្នកស្ម័គ្រចិត្តកាកបាទក្រហមកម្ពុជា ២៥រាជធានី-ខេត្ត និងគ្រឹះស្ថានឧត្តមសិក្សាក្នុងរាជធានីភ្នំពេញ» ដែលប្រព្រឹត្តទៅនៅទីស្នាក់ការកណ្តាលកាកបាទក្រហមកម្ពុជា សរុបចំនួន ១៣០នាក់។

មានប្រសាសន៍សំណេះសំណាល និងបិទកិច្ចប្រជុំនេះ, ឯកឧត្តម ពិត ចំណាន បានពាំនាំប្រសាសន៍របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងជាប្រធានក្រុមការងារទ្រទ្រង់សកម្មភាពយុវជន និងអ្នកស្ម័គ្រចិត្តកាកបាទក្រហមកម្ពុជា ដែលផ្តាំផ្ញើសួរសុខទុក្ខ ក្តីនឹករលឹក និងកោតសរសើរយ៉ាងក្រៃលែងចំពោះគណៈអភិបាល គណៈកម្មាធិការសាខា មន្ត្រីប្រតិបត្តិសាខា គណៈគ្រប់គ្រងនៃគ្រឹះស្ថានឧត្តមសិក្សាក្នុងរាជធានីភ្នំពេញ ទីប្រឹក្សាយុវជន យុវជន និងអ្នកស្ម័គ្រចិត្តទាំងអស់ ដែលបាននិងកំពុងបំពេញការងារមនុស្សធម៌ ជួយសម្រាលការលំបាកជូនបងប្អូនប្រជាពលរដ្ឋរងគ្រោះ និងងាយរងគ្រោះបំផុត នៅតាមសហគមន៍ទូទាំងប្រទេស និងតាមគ្រឹះស្ថានសិក្សារបស់ខ្លួន។

ជាមួយគ្នានេះ ឯកឧត្តម បានគូសបញ្ជាក់ពីគោលដៅរបស់រាជរដ្ឋាភិបាល ក្រោមការដឹកនាំរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ធ្វើយ៉ាងណាឱ្យកម្ពុជាក្លាយជាប្រទេសមានប្រាក់ចំណូលមធ្យមកម្រិតខ្ពស់ នៅឆ្នាំ២០៣០ និងក្លាយជាប្រទេសមានចំណូលខ្ពស់នៅឆ្នាំ២០៥០។ ការសម្រេចបានគោលដៅធំៗទាំងនេះ គឺពិតជាចាំបាច់ណាស់ ត្រូវការធនធានមនុស្សដ៏ពូកែ ដូចអ្វីដែលជាយុទ្ធសាស្ត្របញ្ចកោណ-ដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភា ដោយមុំទី១ គឺផ្តោតលើការកសាងមូលធនមនុស្ស។ 

ឯកឧត្តម បានបញ្ជាក់បន្ថែមថា “ការកសាង និងពង្រឹងក្លិបយុវជនកាកបាទក្រហមកម្ពុជា នៅតាមគ្រឹះស្ថានសិក្សា គឺជាការរួមចំណែកក្នុងការកសាងមូលធនមនុស្ស ដែលតាមគ្រឹះស្ថានសិក្សានីមួយៗ បាននិងកំពុងកសាងយុវជនដែលពោរពេញទៅដោយចំណេះដឹង គុណធម៌ និងសុជីវធម៌។” ក្នុងឱកាសនោះដែរ ឯកឧត្តម បានគូសបញ្ជាក់ និងផ្តល់អនុសាសន៍មួយចំនួនដូចជាៈ សូមក្មួយយុវជនកាកបាទក្រហមកម្ពុជា បន្តតួនាទីជាមិត្តអប់រំមិត្ត,ជំរុញក្លិបយុវជនរបស់ក្មួយៗឱ្យកាន់តែសកម្ម, សូមសាខាកាកបាទក្រហមកម្ពុជាទាំង ២៥រាជធានី-ខេត្ត បន្តសហការជាមួយ មន្ទីរអប់រំ យុវជន និងកីឡា ដោយយកចិត្តទុកដាក់ ផ្សារភ្ជាប់ទំនាក់ទំនងជាមួយលោកគ្រូ អ្នកគ្រូ នៅតាមសាលារៀន និងមាតាបិតាសិស្ស ដើម្បីតាមដានការសិក្សារបស់កូនៗ សិស្ស និស្សិត និងយុវជន និងជំរុញការងារសង្គមជាដើម។ ពិសេសគណៈគ្រប់គ្រង លោកគ្រូ អ្នកគ្រូ ទីប្រឹក្សាយុវជន នៅតាមគ្រឹះស្ថានសិក្សាទាំងអស់ បន្តជំរុញ និងបណ្តុះគំនិតយុវជនទាំងអស់ ឱ្យមានគំនិតស្នេហាជាតិ ដើម្បីជួយសង្គម ៕ អត្ថបទៈ សំ ងីម