ផ្សែងអ័ព្ទពុលបានបន្តគ្របដណ្តប់តំបន់ជាច្រើននៅរដ្ឋធានីញូវដែល្លីនាថ្ងៃព្រហស្បតិ៍នេះ ធ្វើឲ្យរដ្ឋាភិបាលទីក្រុងរបស់ប្រទេសឥណ្ឌាមួយនេះ រក្សាផែនការសកម្មភាពប្រឆាំងនឹងខ្យល់កខ្វក់ឲ្យចូលជាធរមាន ។

សន្ទស្សន៍របស់ស្ថានទូតសហរដ្ឋអាមេរិកប្រចាំនៅទីក្រុងដែល្លី បានវាស់គុណភាពខ្យល់(AQI)កម្រិត ២៧៩ ធ្វើឲ្យគុណភាពខ្យល់ស្ថិតក្នុងកម្រិតគ្មានសុខភាពខ្លាំង ។

AQI កម្រិតពី ០-៥០ ត្រូវបានចាត់ទុកថាជាកម្រិតល្អ ខណៈដែលកម្រិតពី ៤០០-៥០០ ធ្វើឲ្យប៉ះពាល់ដល់សុខភាពមនុស្ស និងចាត់ទុកថាជាកម្រិតគ្រោះថ្នាក់ដល់អ្នកដែលមានជំងឺប្រចាំកាយ ។

រដ្ឋមន្រ្តីក្រសួងបរិស្ថានក្រុងដែល្លី លោក Gopal Rai បាននិយាយថា បទបញ្ជាក្រោមដំណាក់កាលទី ៣នៃផែនការឆ្លើយតបសកម្មភាពគ្រប់កម្រិត (GRAP) នឹងបន្តចូលជាធរមានរហូតដល់គុណភាពខ្យល់ល្អប្រសើរឡើង ។

គួរឲ្យដឹងថា គណៈកម្មាធិការគ្រប់គ្រងខ្យល់កខ្វក់កណ្តាល(CPCB) របស់ប្រទេសឥណ្ឌា បាននិយាយនៅថ្ងៃពុធនេះថា គុណភាពខ្យល់នៅក្នុងរដ្ឋធានីញូវដែល្លី បានធ្លាក់ពីកម្រិតអន់បំផុតកាលពីរយៈពេល ១ថ្ងៃមុន ដល់កម្រិតធ្ងន់ធ្ងរនៅថ្ងៃនេះ ។

 រដ្ឋធានីមានខ្យល់កខ្វក់ជាងគេបំផុតរបស់ពិភពលោកមួយនេះ បានចាប់ផ្តើមឡើងវិញការប្រយុទ្ធប្រឆាំងប្រចាំឆ្នាំរបស់ខ្លួនលើខ្យល់កខ្វក់នៅក្នុងខែនេះ បើទោះបីជារដ្ឋាភិបាលសន្យាធ្វើឲ្យល្អប្រសើរឡើងស្ថានភាពខ្យល់កខ្វក់ក៏ដោយ ។ 

ទិន្នន័យពី CPCB បង្ហាញពីសន្ទស្សន៍គុណភាពខ្យល់លើសពីកម្រិត ៤០០នៅតាមតំបន់ជាច្រើន នៅក្នុងរដ្ឋធានីរបស់ប្រទេសឥណ្ឌាមួយនេះ ។ គុណភាពខ្យល់កខ្វក់លើសពីកម្រិត ៦០ ត្រូវបានគេចាត់ទុកថាជាខ្យល់គ្មានសុខភាព ។

ខ្យល់កខ្វក់នៅក្នុងទីក្រុងញូវដែល្លី កាន់តែអាក្រក់ខ្លាំងនៅរដូវរងា ពេលដែលល្បឿនខ្យល់បក់ធ្លាក់ចុះ និងអាកាសធាតុត្រជាក់ទាក់ខ្យល់កខ្វក់បង្កឡើងដោយសាររថយន្ត ឧស្សាហកម្ម និងការដុតកាកសំណល់កសិកម្មនៅតាមរដ្ឋជុំវិញ ដើម្បីត្រៀមដាំដំណាំថ្មី ៕