នាយករដ្ឋមន្ត្រីអេស្ប៉ាញ លោក Pedro Sanchez និងសមភាគីបែលហ្ស៊ិក លោក Alexander de Croo បានជួបជាមួយនាយករដ្ឋមន្ត្រីអ៊ីស្រាអែល លោក Benjamin Netanyahu នៅថ្ងៃព្រហស្បតិ៍ (ទី២៣ ខែវិច្ឆិកា) នេះ នៅឯទីក្រុងហ្សេរុយសាឡិម អំឡុងដំណើរទស្សនកិច្ចផ្លូវការ ដែលតំណាងឲ្យប្រធានប្តូរវេននាពេលបច្ចុប្បន្ន និងនាពេលខាងមុខនៃក្រុមប្រឹក្សាសហភាពអឺរ៉ុប។

ជាមួយគ្នានេះ មេដឹកនាំទាំង ២រូប ក៏គ្រោងនឹងជួបផងដែរ នៅថ្ងៃព្រហស្បតិ៍នេះ ជាមួយប្រធានាធិបតីអ៊ីស្រាអែលលោក Isaac Herzog និងមេដឹកនាំប៉ាឡេស្ទីន លោក Mahmoud Abbas។

រដ្ឋមន្ត្រីការបរទេសអេស្ប៉ាញលោក Jose Manuel Albares នៅថ្ងៃព្រហស្បតិ៍នេះ បាននិយាយថា ប្រទេសរបស់លោកកំពុងគាំទ្របទឈប់បាញ់ ក្នុងបុព្វហេតុមនុស្សធម៌ រវាងអ៊ីស្រាអែល និងក្រុមហាម៉ាស «ក្នុងរយៈពេលដ៏ខ្លីបំផុត»។

ប្រទេសអ៊ីស្រាអែល បានឲ្យដឹងថា ការដោះលែងចំណាប់ថ្នូរ ដែលមានន័យថា កើតមានអមជាមួយនឹងបទឈប់បាញ់ដំបូងនៃសង្រ្គាមនេះ នឹងត្រូវពន្យារពេលយ៉ាងហោចណាស់ រហូតដល់ថ្ងៃសុក្រ (ទី២៤ ខែវិច្ឆិកា)៕