បេក្ខជនប្រឡងសញ្ញាបត្រមធ្យមសិក្សាទុតិយភូមិឆ្នាំ ២០២៣នេះ ឈ្មោះ ទក ភីរ៉ាវីន សិស្ស ដែល​មកពីវិទ្យាល័យ ១០ មករា ១៩៧៩ ដែលស្ថិតនៅខេត្តសៀមរាប ទទួលបាននិទ្ទេស A ក្នុង​លំដាប់ពិន្ទុ ១០០ ក្នុងចំណោមនិទ្ទេស A សរុបចំនួន ១៦៧៣ នាក់ ទូទាំងប្រទេស។

លោក លី ប៊ុនណា ប្រធានមន្ទីរអប់រំ យុវជន និងកីឡាខេត្តសៀមរាប បានប្រាប់ BTV ឱ្យ​ដឹង​នា​ព្រឹក​ថ្ងៃទី២៤ ខែវិច្ឆិកា ឆ្នាំ ២០២៣នេះថា យុវជន ទក ភីរ៉ាវីន ពិតជាទទួលបាននិទ្ទេស A គ្រប់​មុខ​វិជ្ជា លើកតែងតែភាសាបរទេសដែលបាននិទ្ទេស B ដែលជាហេតុធ្វើឱ្យយុវជនរូបនេះ អាច​ក្តាប់​យក​ពិន្ទុរហូតដល់ ១០០ ពេញខ្ពស់ជាងគេនៅទូទាំងប្រទេស។

បើតាមលោក លី ប៊ុនណា ជាលទ្ធផលប្រឡងសញ្ញាបត្រមធ្យមសិក្សាទុតិយភូមិ នៅក្នុង​ខេត្ត​សៀមរាប សិស្សរបស់យើងប្រឡងជាប់រហូតដល់ទៅ ៨០,៨៩ ភាគរយ ក្នុងនោះ​សិស្ស​ប្រឡង​ជាប់​និទ្ទេស A ចំនួន ១៨៨ នាក់៕