បាល់ទាត់៖ ក្រុមព្រះខ័នរាជស្វាយរៀង បានយកឈ្នះក្រុមម្ចាស់ផ្ទះខេត្តព្រៃវែងដោយលទ្ធផល ១-០ ក្នុងជំនួបពានរង្វាន់ League Cup 2021 By Forward ប្រចាំពូល B នៅទីលានវិទ្យាស្ថានជាតិអប់រំកាយ និងកីឡា កាលពីថ្ងៃទី១៣ ខែមិថុនាម្សិលមិញ ខណៈ ១គ្រាប់របស់ក្រុមភ្ញៀវធ្វើសម្រេចដោយខ្សែបម្រើវ័យក្មេង ជូ ស៊ិនទិ។
ជំនួបសប្ដាហ៍ទី២ នេះ ក្រុមទាំងពីរបានព្យាយាមវាយសម្រុកគ្នាទៅវិញទៅមក និងបានបង្កើតឱកាសជាច្រើនលើក ពិសេសក្រុមព្រះខ័នរាជស្វាយរៀង។ រហូតដល់នាទី៣៣ ទើបក្រុមមានមូលដ្ឋាននៅខេត្តស្វាយរៀងនេះ បានបើកការនាំមុខក្រុមម្ចាស់ផ្ទះ ១គ្រាប់មុនដែលធ្វើសម្រេចដោយកីឡាករ ជូ ស៊ិនទិ បន្ទាប់ពីទទួលបាល់ទាត់ហ្វ្រីឃីកពីរៀមច្បង សួន សុវណ្ណ ហើយក៏ជាគ្រាប់ជ័យជម្នះផងដែរ បន្ទាប់ពីខេត្តព្រៃវែងព្យាយាមវាយបកតែមិនបានសម្រេច។ ប៉ុន្តែនៅនាទី៣៣ កីឡាករ ជូ ស៊ិនទិ ក៏បានទាត់បំប៉ោងសំណាញ់ទីក្រុមម្ចាស់ផ្ទះ ១គ្រាប់មុន ក្រោយទទួលបាល់ទាត់ហ្វ្រីឃីកពីរៀមច្បង សួន សុវណ្ណ ហើយក៏ជាគ្រាប់ជ័យជម្នះទាំងប្រផិតប្រផើយក្នុងការប្រកួតនេះផងដែរ បន្ទាប់ពីខេត្តព្រៃវែងព្យាយាមវាយបកតែមិនបានសម្រេច។
នេះគឺជាជ័យជម្នះលើកដំបូងរបស់ក្រុមព្រះខ័នរាជស្វាយរៀង ក្នុងពានរង្វាន់លក្ខណៈមិត្តភាព និងដកស្រង់បទពិសោធន៍នេះ បន្ទាប់ពីប្រកួតបើកឆាករបស់ពួកគេ ដែលគ្រោងជួបក្រុមយុវជនសាលាបាល់ទាត់ជាតិបាទីកាលពីថ្ងៃទី០៦ ខែមិថុនាកន្លងទៅត្រូវបានលុបចោល បន្ទាប់ពីរកឃើញករណីសង្ស័យវិជ្ជមានកូវីដ-១៩ លើក្រុមការងារម្នាក់របស់ក្រុមយុវជនសាលាបាល់ទាត់ជាតិបាទី។ គួរបញ្ជាក់ថា ការប្រកួតពានរង្វាន់ League Cup 2021 សប្ដាហ៍ទី២ គឺមានតែ ១ប្រកួតប៉ុណ្ណោះ បន្ទាប់ពីការប្រកួតរវាងក្រុមវិសាខា និងក្លិបភ្នំពេញក្រោនដែលគ្រោងជួបគ្នាកាលពីថ្ងៃទី១២ ខែមិថុនាត្រូវបានលុបចោលភ្លាមៗ ក្រោយគណៈកម្មការរៀបចំការប្រកួតបានរកឃើញករណីសង្ស័យវិជ្ជមានកូវីដ-១៩ លើកីឡាករ ២រូបរបស់ក្លិបភ្នំពេញក្រោនមុនការប្រកួត ១ថ្ងៃ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
