នាយកដ្ឋានអភិវឌ្ឍន៍វប្បធម៌ នៃក្រសួងវប្បធម៌ និងវិចិត្រសិល្បៈ នឹងរៀបចំ​ពិព័រណ៍​រូបថត​ក្រោម​ប្រធានបទ "ក្រឡេកមើលអង្គរ ៣ទសវត្សរ៍កន្លង" រយៈពេល១៥ថ្ងៃ ចាប់ផ្តើមពីថ្ងៃទី១ រហូត​ដល់​ថ្ងៃ​ទី​១៥ ខែធ្នូ ឆ្នាំ២០២៣ខាងមុខនេះ នៅក្នុងបរិវេណសារមនី្ទរខ្លែងខ្មែរ នៃ​នាយកដ្ឋាន​អភិវឌ្ឍន៍​វប្បធម៌។

លោក រឿង សារ៉េត ប្រធានស្តីទីនាយកដ្ឋានអភិវឌ្ឍន៍វប្បធម៌ បានថ្លែងប្រាប់BTVព័ត៌មាន នា​ថ្ងៃ​នេះ​ថា ការតាំងពិព័រណ៍នេះ ក្នុងគោលបំណងអបអរសាទរខួប៣១ឆ្នាំ នៃការ​ដាក់​បញ្ចូល​រមណីយ​ដ្ឋាន​អង្គរ​ជា​សម្បតិ្តបេតិកភណ្ឌពិភពលោក (១៤ ធ្នូ ១៩៩២ - ១៤ ធ្នូ ២០២៣) ជា​ការ​បើក​ឱកាស​ឲ្យ​សាធារណជន យុវជន សិស្សានុសិស្ស ពិសេសអ្នក​ចង់​ស្វែង​យល់​ពី​សិល្បៈ​ថត​រូប​បាន​ចូល​ទស្សនា​រូបថតដ៏វិចិត្រនៃប្រាង្គប្រាសាទអង្គរជាសម្បតិ្តវប្បធម៌ដ៏មានតម្លៃនៃមនុស្សជាតិ ពិព័រណ៍​នេះ​ក៏ផ្តោតលើស្ថាបត្យកម្ម ដ៏គួរឲ្យស្ងប់ស្ងែងនៃតំបន់អង្គរ និងស្នាដៃ​សិល្បៈ​ថត​រូប​ដ៏​មាន​ទេព​កោសល្យ​របស់លោក បាគូ សៃតូ (Baku Saito) អ្នកឯកទេសថតរូបជនជាតិជប៉ុន ដែល​បាន​បន្សល់​ទុករូបថតចំនួន៦២ផ្ទាំងសម្រាប់ផ្សព្វផ្សាយបន្ត។

ជាចុងក្រោយលោក រឿង សារ៉េត បានអំពាវនាវដល់សាធារណជន អញ្ជើញ​មក​ចូល​រួម​ទស្សនា​អំពី​សម្បតិ្ត​បេតិកភណ្ឌ និងស្នាដៃសិល្បៈថតរូបរបស់បាគូ សៃតូ (Baku Saito) អ្នក​ឯក​ទេស​ថត​រូប​ជន​ជាតិ​ជប៉ុនដ៏ល្អវិចិត្រនេះ ដែលពោរពេញដោយភាពទាក់ទាញភ្ញៀវទេសចរជាតិ អន្តរជាតិ និង​កំពុងរួមចំណែកយ៉ាងសំខាន់ ក្នុងការអភិវឌ្ឍន៍សេដ្ឋកិច្ចជាតិ។ គម្រោងរៀបចំតាំងពិព័រណ៍នេះ នឹង​ប្រព្រឹត្ត​ទៅរយៈពេល១៥ថ្ងៃ ដោយចាប់ផ្តើមពីថ្ងៃទី១ ដល់ថ្ងៃទី១៥ ខែធ្នូ ឆ្នាំ២០២៣ នៅ​សារ​មន្ទី​រ​ខ្លែង​ខ្មែរ (ទល់មុខវិមានរដ្ឋសភាជាតិ) សង្កាត់ទន្លេបាសាក់ ខណ្ឌចំការមន រាជធានីភ្នំពេញ៕ អត្ថបទ៖ រដ្ឋា