ក្រសួងប្រៃសណីយ៍ និងទូរគមនាគមន៍ ក្រសួងពាណិជ្ជកម្ម និងក្រសួងអធិការកិច្ចចុះហត្ថលេខា​លើ​អនុស្ស​រណៈ​លើ​ការ​យោគយល់ ស្តីពី​កិច្ច​សហប្រតិបត្តិការ​ដាក់​ឱ្យ​ប្រើ​ថ្នាល​ផ្ទៀង​ផ្ទាត់​ឯកសារ​តាម​ប្រព័ន្ធឌីជីថល។

ពិធីចុះហត្ថលេខាលើអនុស្សរណៈលើការយោគយល់ស្តីពីកិច្ចសហប្រតិបត្តិការដាក់ឱ្យប្រើថ្នាលផ្ទៀង​ផ្ទាត់​ឯកសារ verify.gov.kh ក្នុងការរៀបចំហេដ្ឋារចនាសម្ព័ន្ធ ការតភ្ជាប់អ៊ីនធឺណិត និង​ការ​រៀប​ចំ​វគ្គបណ្តុះបណ្តាលជំនាញឌីជីថលជូនដល់មន្រ្តីរាជការ ដែល​ពិធី​នៅ​បាន​ធ្វើឡើ​ង​នា​រសៀល​ថ្ងៃ​ទី​២៣ ខែវិច្ឆិកា ឆ្នាំ២០២៣ នៅទីស្ដីការក្រសួងប្រៃសណីយ៍និងទូរគមនាគមន៍ ក្រោម​អធិបតី​ភាព​ឯកឧត្ដម ជា វ៉ាន់ដេត លោកជំទាវ ចម និម្មល និងឯកឧត្តម ហួត ហាក់។

អនុស្សរណៈនេះផ្តោតលើគោលបំណង ៣ សំខាន់គឺ កិច្ច​សហប្រតិបត្តិ​ការ​ដាក់​ឱ្យ​ប្រើ​ថ្នាល​ផ្ទៀង​ផ្ទាត់​ឯកសារ verify.gov.kh ការរៀបចំហេដ្ឋារចនាសម្ព័ន្ធនិងការតភ្ជាប់អ៊ិនធឺណិត និង​ការ​រៀបចំ​វគ្គ​បណ្តុះ​បណ្តាលជំនាញឌីជីថលជូនដល់មន្រ្តីរាជការក្រោមឱវាទក្រសួងពាណិជ្ជកម្ម និង​ក្រសួង​អធិការកិច្ច ។

ពិធីចុះហត្ថនេះ គឺជាលើកទី៧ ហើយ ដែលក្រសួងប្រៃសណីយ៍និងទូរគមនាគមន៍ បាន​រៀប​ចំ​ពិធី​ចុះ​ហត្ថ​លេខា​លើ​អនុស្ស​រណៈ និង​កិច្ច​ព្រម​ព្រៀង​ស្តីពី​កិច្ច​សហប្រតិបត្តិការ​ក្នុង​ការ​ដាក់​ឱ្យ​ប្រើ​ថ្នាល​ផ្ទៀងផ្ទាត់ឯកសារ verify.gov.kh និងការធ្វើឌីជីថលូបនីយកម្មក្នុងក្រសួង ស្ថាប័នរដ្ឋ និង​គ្រឹះ​ស្ថាន​ឧត្តមសិក្សា ដែលមកដល់ពេលនេះ មានក្រសួងនិងគ្រឹះស្ថានឧត្តមសិក្សាចំនួន ២៨ ហើយ​ដែលបានចូលរួមជាមួយ ក្រសួងប្រៃសណីយ៍និងទូរគមនាគមន៍ ក្នុងដំណើរ​ការ​កសាង​រដ្ឋាភិបាល​ឌីជីថល និងពលរដ្ឋឌីជីថល ស្របតាមគោលនយោបាយ និងយុទ្ធសាស្ត្រខាងលើ។

សូម​បញ្ជាក់ផងដែរថា ថ្នាលផ្ទៀងផ្ទាត់ឯកសារ verify.gov.kh គឺជាថ្នាលរបស់រាជរដ្ឋាភិបាល ដែល​អភិវឌ្ឍដោយ ក្រសួងប្រៃសណីយ៍និងទូរគមនាគមន៍ និងត្រូវ​បាន​ដាក់​ឱ្យ​ប្រើ​ក្នុង​គោល​បំណង​លុប​បំបាត់ការក្លែងបន្លំឯកសារ ផ្តល់ភាពងាយស្រួលក្នុងការប្រើ និងផ្ទៀង​ផ្ទាត់​ភាព​ត្រឹម​ត្រូវ​នៃ​ឯកសារ ផ្តល់ទំនុកចិត្ត ចំណេញពេលវេលា និងកាត់បន្ថយចំណាយនានា ព្រម​ទាំង​ជំរុញ​ការ​ធ្វើ​បរិវត្តកម្មឌីជីថល ស្របតាមឧត្តមានុវត្តជាអន្តរជាតិ៕ អត្ថបទ៖ ប្រាក់ វ៉ាន់ដា