រដ្ឋមន្ត្រីការបរទេសហុងគ្រី នៅទីស្នាក់ការអង្គការសហប្រជាជាតិក្នុងទីក្រុងញូវយ៉ក បាននិយាយថា ប្រទេសហុងគ្រីគឺប្រឆាំងនឹងការដាក់បញ្ចូលអ៊ុយក្រែន ទៅក្នុងសហភាពអឺរ៉ុប ក្នុងអំឡុងពេលសង្រ្គាមព្រោះវាជាពេលវេលាដ៏សាកសមសម្រាប់រុស្ស៊ី និងអ៊ុយក្រែន ក្នុងការចរចាសន្តិភាព។

នៅក្នុងបទសម្ភាសន៍ផ្តាច់មុខជាមួយទូរទស្សន៍កណ្តាលចិន (CCTV) រដ្ឋមន្ត្រីក្រសួងការបរទេស និងពាណិជ្ជកម្មហុងគ្រី លោក ភីធឺ ហ្ស៊ីចចាតូ (Peter Szijjarto) បាននិយាយថា ការយកចិត្តទុកដាក់ជាសកលលើជម្លោះរុស្ស៊ី និងអ៊ុយក្រែន បានផ្លាស់ប្តូរដោយសារតែសង្គ្រាមនៅតំបន់ហ្កាហ្សា ស្ទ្រីប ហើយឥឡូវនេះគឺជាពេលវេលាដ៏ល្អឥតខ្ចោះសម្រាប់ ភាគីទាំងពីរក្នុងការធ្វើការចរចាសន្តិភាពដើម្បីការពារកុំឲ្យមានអ្នករងគ្រោះ និងការបំផ្លិចបំផ្លាញបន្ថែមទៀត។

លោក ហ្ស៊ីចចាតូ បានបន្ថែមថា មានទស្សនៈផ្សេងគ្នាជាច្រើននៅក្នុងរដ្ឋាភិបាលហុងគ្រី នៅពេលនិយាយអំពីសមាជិកភាពសហភាពអឺរ៉ុបរបស់អ៊ុយក្រែន តែទោះជាយ៉ាងណាក៏ដោយ ការដាក់បញ្ចូលភាគីមួយនៃសង្រ្គាម នឹងបង្កើនភាពតានតឹងបន្ថែមទៀត ហើយនាំសហភាពអឺរ៉ុបចូលទៅក្នុងសង្រ្គាមកាន់តែខ្លាំង ហើយប្រទេសមួយ ដែលកំពុងមានសង្រ្គាម មានភាពមិនច្បាស់លាស់ និងបញ្ហាជាច្រើនដែលមិនអាចដោះស្រាយបាន៕