អាហ្សង់ទីន ៖ ពលរដ្ឋអាហ្សង់ទីន បានដើរដង្ហែតាមដងផ្លូវនៃទីក្រុង ប៊ុយណូ ស៊ែរ (Buenos Aires) កាលពីថ្ងៃព្រហស្បតិ៍ (២៣ វិច្ឆិកា) ដោយសម្តែងការព្រួយបារម្ភចំពោះគោលនយោបាយរបស់ប្រធានាធិបតីសេរីស្តាំនិយម លោក Javier Milei ដែលទើបជាប់ឆ្នោត។ 

ក្រុមអ្នករិះគន់បានចោទប្រកាន់លោក Milei ពីបទបន្ទាបបន្ថោកអំពើឃោរឃៅក្នុងអំឡុងពេលរបបផ្តាច់ការដ៏ឃោរឃៅរបស់ប្រទេសពីឆ្នាំ ១៩៧៦ ដល់ឆ្នាំ១៩៨៣។ 

ប្រធានាធិបតីជាប់ឆ្នោតរូបនេះ ក៏ប្រឆាំងយ៉ាងម៉ឺងម៉ាត់ចំពោះច្បាប់រំលូតកូន អនុគ្រោះដល់ច្បាប់ប្រើប្រាស់កាំភ្លើងដែលធូររលុង និងបានប្តេជ្ញាធ្វើឯកជនភាវូបនីយកម្មក្រុមហ៊ុន ដែលគ្រប់គ្រងដោយរដ្ឋ រួមទាំងប្រព័ន្ធផ្សព្វផ្សាយផងដែរ។ លោក Milei បានសន្យាបង្កើតយុគសម័យនយោបាយថ្មីសម្រាប់អាហ្សង់ទីន។ 

ផែនការរបស់លោករួមមានការបិទធនាគារកណ្តាល លុបបំបាត់រូបិយប័ណ្ណប៉េសូ និងកាត់បន្ថយការចំណាយ ព្រមទាំងលទ្ធភាពកំណែទម្រង់សេដ្ឋកិច្ចដ៏ឈឺចាប់ ដែលធ្វើអោយអ្នកបោះឆ្នោតខឹងសម្បារចំពោះបញ្ហាសេដ្ឋកិច្ច៕