អុីស្រាអែល ៖ បទឈប់បាញ់រយៈពេលបួនថ្ងៃនៅក្នុងតំបន់ហ្កាហ្សា បានចាប់ផ្តើមនៅថ្ងៃសុក្រ (២៤ វិច្ឆិកា) នេះ ដែលសម្រេចបានរវាងអ៊ីស្រាអែល និងក្រុមហាម៉ាស កាលពីថ្ងៃពុធដំបូង ក្រោមកិច្ចព្រមព្រៀងដោះដូរសម្រាប់ដោះលែងចំណាប់ថ្នូរយ៉ាងហោចណាស់ ៥០នាក់ ពីតំបន់ហ្កាហ្សា ជាថ្នូរនឹងអ្នកទោសស្ត្រី និងកុមារប៉ាឡេស្ទីនប្រហែល ១៥០នាក់ ដែលត្រូវបានឃុំខ្លួននៅក្នុងពន្ធនាគារអ៊ីស្រាអែល។

កិច្ចព្រមព្រៀងនេះបានទាក់ទាញប្រតិកម្មស្វាគមន៍ជាច្រើនពីអន្តរជាតិ។ ក្រសួងការបរទេសចិន បានសម្តែងក្តីសង្ឃឹមថា ចំណាត់ការនេះនឹងជួយសម្រាលទុក្ខលំបាកនៃវិបត្តិមនុស្សធម៌ ជំរុញការបន្ថយជម្លោះ និងបន្ធូរបន្ថយភាពតានតឹង។

ប្រធានគណៈកម្មការអឺរ៉ុប លោកស្រី Ursula von der Leyen នៃសហភាពអឺរ៉ុប បានស្វាគមន៍កិច្ចព្រមព្រៀងដែលសម្រេចបានរវាងអ៊ីស្រាអែល និងក្រុមហាម៉ាសនេះ ហើយអេហ្ស៊ីបបានសាទរចំពោះជោគជ័យនៃការសម្រុះសម្រួលដែលខ្លួនបានធ្វើឡើងជាមួយប្រទេសកាតា និងសហរដ្ឋអាមេរិក ក្នុងការសម្របសម្រួល «បទឈប់បាញ់មនុស្សធម៌» នៅតំបន់ហ្កាហ្សា ស្ទ្រីប។

បណ្ដាប្រទេសជាច្រើនទៀតក៏បានស្វាគមន៍ចំពោះចំណាត់ការនេះផងដែរ ដូចជាសហរដ្ឋអាមេរិក បារាំង រុស្ស៊ី ទួរគី អង្គការឃ្លាំមើលសិទ្ធិមនុស្ស អ៊ីរ៉ង់ រដ្ឋាភិបាលអ៊ីស្រាអែល និងជនជាតិអ៊ីស្រាអែល ហ្ស៊កដានី ប៉ាឡេស្ទីន និងប្រទេសជាច្រើនទៀត។ ពួកគេសាទរចំពោះការផ្អាកនេះ ហើយបាននិយាយថា វាគឺជាជំហានដ៏សំខាន់មួយឆ្ពោះទៅរកការសម្រាលបន្ទុកដល់ក្រុមគ្រួសារចំណាប់ថ្នូរ និងដោះស្រាយវិបត្តិមនុស្សធម៌នៅហ្កាហ្សា៕