នេប៉ាល់ ៖ នគរបាលក្នុងប្រទេសនេប៉ាល់ កាលពីថ្ងៃព្រហស្បតិ៍ (ទី២៣ ខែវិច្ឆិកា) បានប្រើដំបងផ្តៅ ឧស្ម័នបង្ហូរទឹកភ្នែក និងកាណុងបាញ់ទឹក ដើម្បីបំបែកពួកបាតុកររាប់ពាន់នាក់ ដែលទាមទារឲ្យមានការស្តារឡើងវិញនូវរបបរាជានិយម ដែលត្រូវបានលុបបំបាត់ចោល កាលពី ១៥ឆ្នាំមុន។

ក្រុមបាតុករ ដែលដាក់ឈ្មោះការតវ៉ានេះថា «យុទ្ធនាការពលរដ្ឋ» និយាយថា រដ្ឋាភិបាល ដែលលេចរូបរាងឡើងតាំងពីរបបរាជានិយម ត្រូវបានលុបបំបាត់ចោលនោះ ពោលគឺជាផ្នែកនៃកិច្ចព្រមព្រៀងបញ្ចប់ការបះបោរម៉ៅនិយម បានបរាជ័យ ក្នុងការសម្រេចតាមការប្តេជ្ញាចិត្ត ដើម្បីអភិវឌ្ឍប្រទេសក្រីក្របំផុតមួយរបស់ពិភពលោកឲ្យរីកចម្រើន។

យោងតាមសាក្សី បានឲ្យដឹងថា ក្រុមបាតុករបានព្យាយាមរុះរើរបាំងរបស់នគរបាល នៅជាយក្រុងកាត់ម៉ាន់ឌូ (Kathmandu) ហើយដើរក្បួនទៅកាន់កណ្តាលនៃរដ្ឋធានី ដែលជំរុញឲ្យនគរបាលបង្ក្រាបកុបកម្មចូលអន្តរាគមន៍ និងទប់ស្កាត់ក្រុមមនុស្សទាំងនោះ។ មន្ត្រីជាន់ខ្ពស់ម្នាក់ បាននិយាយថា មន្ត្រីនគរបាលខ្លះ បានរងរបួស ដោយសារក្រុមបាតុករគប់ដុំថ្មដាក់។

សូមរំលឹកថា សភាជាប់ឆ្នោតពិសេសមួយ បានលុបបំបាត់របបរាជានិយម ដែលមានអាយុកាល ២៣៩ឆ្នាំក្នុងឆ្នាំ២០០៨ ក្រោមលក្ខខណ្ឌនៃកិច្ចព្រមព្រៀង ដែលបានបញ្ចប់ការបះបោរម៉ៅនិយម ដែលបានសម្លាប់មនុស្ស ១៧.០០០នាក់ នៅចន្លោះឆ្នាំ១៩៩៦ និងឆ្នាំ២០០៦ ហើយបានបង្កើតរបបសាធារណរដ្ឋសហព័ន្ធ។ ប៉ុន្តែអស្ថិរភាពនយោបាយ បានប៉ះពាល់ដល់ប្រទេសនេប៉ាល់ ចាប់តាំងពីការបញ្ចប់នៃរបបរាជានិយមនោះ ដោយមានការផ្លាស់ប្តូររដ្ឋាភិបាលជាង ១០លើក៕